અમદાવાદ જિલ્લાના બાવળા તાલુકામાં ફરી એકવાર હાઈવે પર બેફામ દોડતા વાહનોએ એક નિર્દોષનો ભોગ લીધો છે. બાવળા નજીક આવેલા રામનગર પાટિયા પાસે હિટ એન્ડ રનની ગંભીર ઘટના બની છે, જેમાં એક બાઈક ચાલકનું ઘટનાસ્થળે જ કરૂણ મોત નીપજ્યું છે.

બાવળામાં હિટ એન્ડ રનમાં 1નું મોત

પ્રાપ્ત માહિતી અનુસાર, રામનગર પાટિયા પાસેથી પસાર થઈ રહેલા એક બાઈક સવારને કોઈ અજાણ્યા વાહને પૂરઝડપે આવીને જોરદાર ટક્કર મારી હતી. ટક્કર એટલી ભીષણ હતી કે બાઈક સવાર રોડ પર ફંગોળાયો હતો અને તેને શરીરના ભાગે ગંભીર ઈજાઓ પહોંચી હતી. અકસ્માત સર્જ્યા બાદ અજાણ્યો વાહન ચાલક પોતાની ગાડી લઈ માનવતા નેવે મૂકી ઘટનાસ્થળેથી ફરાર થઈ ગયો હતો.

અજાણ્યા વાહને બાઇકચાલકને મારી ટક્કર

અકસ્માતને પગલે આસપાસના લોકો દોડી આવ્યા હતા, પરંતુ ઈજાઓ એટલી ગંભીર હતી કે બાઈક ચાલકે ત્યાં જ દમ તોડી દીધો હતો. ઘટનાની જાણ થતા જ સ્થાનિક પોલીસ કાફલો ઘટનાસ્થળે પહોંચી ગયો હતો અને મૃતદેહને પોસ્ટમોર્ટમ માટે હોસ્પિટલ ખસેડવાની તજવીજ હાથ ધરી હતી. પોલીસે અજાણ્યા વાહન ચાલક વિરુદ્ધ ગુનો નોંધી વધુ તપાસ શરૂ કરી છે. હાઈવે પર આવેલા સીસીટીવી ફૂટેજ અને સાક્ષીઓની પૂછપરછના આધારે ફરાર વાહન ચાલકને ઝડપી પાડવા માટે ચક્રો ગતિમાન કર્યા છે. 

આ પણ વાંચો: બાલાસિનોરમાં કમળાનો કહેર, 378 કેસ નોંધાતા કલેક્ટરએ હોસ્પિટલની લીધી આકસ્મિક મુલાકાત