અમદાવાદ શહેરમાં યુવાધનને નશાના રવાડે ચઢાવતા તત્વો સામે એન્ટી નાર્કોટિક્સ ટાસ્ક ફોર્સ (ANTF) એ લાલ આંખ કરી છે. શહેરના ગાયકવાડ હવેલી અને રાયખડ વિસ્તારમાં બાતમીના આધારે દરોડા પાડીને પોલીસે નશાકારક ગોળીઓનું મોટું નેટવર્ક ઝડપી પાડ્યું છે. આ ઓપરેશનમાં પોલીસે 3000 જેટલી પ્રતિબંધિત ટેબ્લેટ્સ સાથે 4 શખ્સોની ધરપકડ કરી છે.
અમદાવાદમાં નશાકારક ગોળીઓનું નેટવર્ક
ANTF ને બાતમી મળી હતી કે રાયખડ વિસ્તારમાં એક રિક્ષા મારફતે નશાકારક ગોળીઓનો જથ્થો સપ્લાય કરવામાં આવી રહ્યો છે. પોલીસે વોચ ગોઠવીને શંકાસ્પદ રિક્ષાને આંતરી હતી. તપાસ દરમિયાન રિક્ષામાંથી અલ્પ્રાઝોલમ (Alprazolam) નામની 3000 નશાકારક ગોળીઓ મળી આવી હતી. પોલીસની આ કાર્યવાહીથી ડ્રગ્સ પેડલરોમાં ફફડાટ વ્યાપી ગયો છે.
