શહેરમાં ઓનલાઈન ખરીદીના નામે છેતરપિંડીના કિસ્સાઓ સતત વધી રહ્યા છે. તાજેતરમાં અમદાવાદના બોડકદેવ વિસ્તારમાં રહેતા એક વેપારી સાથે ઘી મંગાવવાના બહાને લાખો રૂપિયાની ઠગાઈ થઈ હોવાની ઘટના સામે આવી છે. ગઠિયાએ વેપારીને વિશ્વાસમાં લઈને લાખો રૂપિયા પડાવી લીધા અને માલની ડિલિવરી ન આપી છેતરપિંડી આચરી છે.
ઓનલાઈન ખરીદીના નામે છેતરપિંડી
ભોગ બનનાર વેપારીએ ઓનલાઈન માધ્યમથી ઘી મંગાવવા માટે સંપર્ક કર્યો હતો. સામેવાળા શખ્સે વેપારીને મોટો ઓર્ડર આપવા લલચાવ્યા હતા અને શરત મૂકી હતી કે ઓર્ડર કન્ફર્મ કરવા માટે કુલ રકમના 50 ટકા પેમેન્ટ એડવાન્સ આપવું પડશે. વેપારીએ તેની વાત પર વિશ્વાસ કરી લીધો હતો.
રૂ. 2.51 લાખથી વધુની રકમ પડાવી લીધી
વેપારીએ ઘીના જથ્થા માટે અલગ-અલગ ટ્રાન્ઝેક્શન દ્વારા કુલ રૂપિયા 2,51,700 ઓનલાઈન ટ્રાન્સફર કરી આપ્યા હતા. પેમેન્ટ મળી ગયા બાદ લાંબો સમય વીતવા છતાં ઘીનો જથ્થો વેપારી સુધી પહોંચ્યો ન હતો. જ્યારે વેપારીએ સંપર્ક કરવાનો પ્રયાસ કર્યો ત્યારે સામેવાળા શખ્સે ફોન ઉપાડવાનું બંધ કરી દીધું હતું અથવા સંતોષકારક જવાબ આપ્યો ન હતો.
પોલીસ કાર્યવાહી
પોતાની સાથે છેતરપિંડી થઈ હોવાનું જણાતા વેપારીએ તાત્કાલિક પોલીસનો સંપર્ક કર્યો હતો. આ મામલે બોડકદેવ પોલીસ સ્ટેશનમાં આરોપી વિરુદ્ધ ભારતીય ન્યાય સંહિતા (BNS) અને IT એક્ટની વિવિધ કલમો હેઠળ ફરિયાદ નોંધાવવામાં આવી છે. સાયબર સેલની મદદથી પોલીસ તે બેંક એકાઉન્ટ અને મોબાઈલ નંબરના આધારે આરોપી સુધી પહોંચવા માટે તપાસ કરી રહી છે.
આ પણ વાંચો: Morbi: ટંકારાના સાવડીમાં તસ્કરોએ 16 વીજપોલ પરથી 1800 મીટર તારની ચોરી કરી, PGVCLને લાખોનું નુકસાન
