મોરબી જિલ્લાના ટંકારા તાલુકામાં તસ્કરોએ હવે વીજ કંપનીને નિશાન બનાવવાનું શરૂ કર્યું છે. સાવડી ગામની સીમમાં આવેલી PGVCLની લાઈનમાંથી મોટા પાયે વીજ તારની ચોરી થવાની ઘટના સામે આવતા ખળભળાટ મચી ગયો છે. તસ્કરોએ રાત્રિના અંધકારનો લાભ લઈ લાખોની કિંમતના એલ્યુમિનિયમ વાયરની ચોરી કરી છે.
PGVCLની લાઈનમાંથી વીજ તારની ચોરી
ટંકારાના સાવડી ગામ પાસે આવેલા અરણેશ્વર ફીડર હેઠળની વીજ લાઈનમાં આ ચોરી થઈ છે. તસ્કરોએ આયોજનબદ્ધ રીતે 16 જેટલા વીજપોલ પરથી વાયર કાપી નાખ્યા હતા. કુલ 15 ગાળામાં ફેલાયેલા અંદાજે 1800 મીટર લાંબા એલ્યુમિનિયમ વાયરની ચોરી કરીને તસ્કરો ફરાર થઈ ગયા છે.