અમદાવાદ શહેરમાં કાયદો અને વ્યવસ્થાની સ્થિતિ જાળવી રાખવા તેમજ ગુનેગારોમાં પોલીસનો ખોફ કાયમ રહે તે હેતુથી અમદાવાદ ક્રાઈમ બ્રાન્ચ દ્વારા એક વિશેષ 'કોમ્બિંગ નાઈટ'નું આયોજન કરવામાં આવ્યું હતું. આ ડ્રાઈવ અંતર્ગત શહેરના સંવેદનશીલ ગણાતા વિસ્તારોમાં પોલીસના કાફલાએ ત્રાટકીને ગુનેગારોની પૂછપરછ અને તપાસ હાથ ધરી હતી.
ત્રણ વિસ્તારોમાં પોલીસની તવાઈ
ક્રાઈમ બ્રાન્ચની વિવિધ ટીમોએ શહેરના સરખેજ, રામોલ અને અમરાઈવાડી વિસ્તારોમાં વ્યાપક તપાસ હાથ ધરી હતી. રાત્રિના સમયે યોજાયેલી આ ડ્રાઈવમાં સ્થાનિક પોલીસને સાથે રાખીને શંકાસ્પદ હિલચાલ ધરાવતા સ્થળો પર દરોડા પાડવામાં આવ્યા હતા.
હિસ્ટ્રીશીટરો અને ન્યુસન્સ ફેલાવનારાઓ રડારમાં
આ કાર્યવાહી દરમિયાન જે શખ્સો પોલીસ ચોપડે ચડી ચૂક્યા છે અને જેમના પર ગંભીર ગુનાઓ નોંધાયેલા છે, તેવા હિસ્ટ્રીશીટરોના રહેઠાણો પર તપાસ કરવામાં આવી હતી. અગાઉ લૂંટ, ચોરી કે મારામારી જેવા ગુનામાં સંડોવાયેલા શખ્સો હાલમાં શું પ્રવૃત્તિ કરી રહ્યા છે તેની ઝીણવટભરી તપાસ કરાઈ હતી. જાહેર માર્ગો કે સોસાયટીઓ પાસે અડિંગો જમાવી ન્યુસન્સ (ત્રાસ) ફેલાવનારા તત્વો વિરુદ્ધ પણ કડક કાર્યવાહી કરવામાં આવી હતી.
શાંતિ જાળવવા પોલીસનો પ્રયાસ
કોમ્બિંગ નાઈટનો મુખ્ય ઉદ્દેશ્ય આગામી તહેવારો અથવા સામાન્ય દિવસોમાં કોઈપણ અનિચ્છનીય ઘટના ન બને તે સુનિશ્ચિત કરવાનો છે. ક્રાઈમ બ્રાન્ચની આ આકસ્મિક કાર્યવાહીથી ગુનેગારોમાં ફફડાટ વ્યાપી ગયો છે. પોલીસ દ્વારા આગામી દિવસોમાં અન્ય વિસ્તારોમાં પણ આવી જ ડ્રાઈવ ચાલુ રાખવામાં આવશે તેવા સંકેત આપવામાં આવ્યા છે.
આ પણ વાંચો: Surendranagar: સોશિયલ મીડિયા પર હથિયાર સાથે ફોટો મૂકવો ભારે પડ્યો, SOGએ યુવકને દબોચ્યો
