આજના સમયમાં ઓનલાઇન એપ્લિકેશન દ્વારા ઘરની સફાઈ કરાવવી સામાન્ય બની ગઈ છે, પરંતુ આ સુવિધા ક્યારેક જોખમી પણ સાબિત થઈ શકે છે. અમદાવાદના બોપલ વિસ્તારમાં હોમ ક્લીનિંગ સર્વિસના નામે ચોરી કરતી એક શાતીર ટોળકીનો બોપલ પોલીસે પર્દાફાશ કર્યો છે. પોલીસે આ મામલે ચાર શખ્સોની ધરપકડ કરી કાયદેસરની કાર્યવાહી હાથ ધરી છે.
એપ્લિકેશન દ્વારા મેળવતા હતા શિકાર
મળતી માહિતી મુજબ, આ ટોળકી ઓનલાઇન એપ્લિકેશન પર પોતાની સર્વિસ લિસ્ટ કરીને ગ્રાહકો મેળવતી હતી. જ્યારે કોઈ ગ્રાહક મકાન સાફ-સફાઈ માટે બુકિંગ કરાવે, ત્યારે આ શખ્સો ટીમ બનીને ત્યાં પહોંચતા હતા. સફાઈ કામના બહાને ઘરના ખૂણેખૂણાની તપાસ કરી લેતા અને ઘરધણીની નજર ચૂકવી કિંમતી સામાન પર હાથ સાફ કરી લેતા હતા.