સુરતના જાણીતા લક્ષ્મી ગ્રુપ પર આયકર વિભાગ (IT) દ્વારા સતત ચોથા દિવસે પણ સર્ચ ઓપરેશન ચાલુ રાખવામાં આવ્યું છે. આ દરોડા દરમિયાન અત્યાર સુધીમાં અંદાજે 8 કરોડ રૂપિયાની કિંમતના સોના, ચાંદી અને ઝવેરાતનો જથ્થો જપ્ત કરવામાં આવ્યો છે. આયકર વિભાગે ગ્રુપના વિવિધ ઠેકાણેથી અનેક મહત્વના દસ્તાવેજો અને ડિજિટલ ડેટા પણ કબજે કર્યા છે. આ તપાસનો વ્યાપ હવે અનિલ બગદાણા સુધી પણ પહોંચ્યો છે, જે વારી એનર્જી ગ્રુપને જમીન અપાવવામાં મધ્યસ્થી તરીકે જોડાયેલા હોવાનું મનાય છે. આયકર વિભાગના આ મોટા ઓપરેશનથી સુરતના ઉદ્યોગ જગતમાં ફફડાટ વ્યાપી ગયો છે.
લક્ષ્મી ગ્રુપ પર IT ની તવાઈ
આ તપાસમાં સૌથી ચોંકાવનારી બાબત વિદેશમાં હવાલા મારફતે નાણાં મોકલવાની આશંકા છે. આયકર વિભાગને શંકા છે કે મોટા પાયે બિનહિસાબી નાણાં વિદેશમાં સગેવગે કરવામાં આવ્યા છે. આ નાણાકીય અનિયમિતતાઓને જોતા હવે આ કેસમાં એન્ફોર્સમેન્ટ ડિરેક્ટોરેટ (ED) પણ તપાસમાં જોડાય તેવી પૂરેપૂરી શક્યતા છે. કાળા નાણાંના વ્યવહારો અને મની લોન્ડરિંગના પુરાવાઓ એકત્રિત કરવા માટે સુરત સહિત અન્ય શહેરોમાં પણ તપાસના તાર લંબાઈ રહ્યા છે. આગામી દિવસોમાં આ દરોડામાં હજુ પણ મોટા ખુલાસા થવાની સંભાવના સેવાઈ રહી છે.