Ahmedabadમાં ગાયના શુદ્ધ ઘી ના નામે વેચાતા ઝેરનો પર્દાફાશ, 400 કિલો નકલી ઘી નો જથ્થો જપ્ત

અમદાવાદ શહેરમાં ખાણીપીણીની વસ્તુઓમાં ભેળસેળ કરનારા તત્વો સામે તંત્રએ લાલ આંખ કરી છે. અમદાવાદમાં ગાયના શુદ્ધ ઘીના નામે નકલી ઘી બનાવવાનું કૌભાંડ ઝડપાયું છે. પોલીસે બાતમીના આધારે દરોડા પાડીને અંદાજે 400 કિલો નકલી ઘીનો જથ્થો પકડી પાડ્યો છે. આ કામગીરી દરમિયાન અંદાજે 1 લાખ 60 હજાર રૂપિયાનો મુદ્દામાલ જપ્ત કરવામાં આવ્યો છે.

પામોલિન તેલ અને ફેટનું ખતરનાક મિશ્રણ

તપાસમાં બહાર આવેલી વિગતો મુજબ, ભેળસેળિયા તત્વો લોકોના આરોગ્ય સાથે ગંભીર ચેડાં કરી રહ્યા હતા. આ નકલી ઘી બનાવવા માટે કોઈ પશુના દૂધનો નહીં, પરંતુ પામોલિન તેલ અને વેજિટેબલ ફેટનો ઉપયોગ કરવામાં આવતો હતો. આ મિશ્રણમાં ચોક્કસ પ્રકારના એસેન્સ અને કલર ભેળવીને તેને આબેહૂબ ગાયના શુદ્ધ ઘી જેવું સ્વરૂપ આપવામાં આવતું હતું, જેને બજારમાં ઊંચી કિંમતે વેચવામાં આવતું હતું.

તંત્રની કડક કાર્યવાહી

આરોગ્ય વિભાગ અને પોલીસે સંયુક્ત રીતે ઓપરેશન હાથ ધરીને આ સમગ્ર નેટવર્કનો પર્દાફાશ કર્યો છે. જપ્ત કરાયેલા ઘીના નમૂના લઈ લેબોરેટરીમાં પરીક્ષણ માટે મોકલી આપવામાં આવ્યા છે. આગામી સમયમાં આ કૌભાંડમાં સંડોવાયેલા અન્ય શખ્સો અને તે ક્યાં સપ્લાય કરવામાં આવતું હતું તે દિશામાં તપાસ તેજ કરવામાં આવી છે. તહેવારોના સમયે કે સામાન્ય દિવસોમાં ઘી ખરીદતી વખતે નાગરિકોને સાવચેત રહેવા અપીલ કરવામાં આવી છે.

આ પણ વાંચો---   Local Body Elections 2026 : ચૂંટણી ટાણે સોશિયલ મીડિયા પર ભડકાઉ પોસ્ટ મૂકનારાઓ સામે સાયબર ક્રાઈમની બાજ નજર