અમદાવાદની સાબરમતી સેન્ટ્રલ જેલ ફરી એકવાર વિવાદોમાં આવી છે. જેલની સુરક્ષા પર ગંભીર સવાલો ઉભા કરતા આ કિસ્સામાં, જેલના 'છોટા ચક્કર' વોર્ડમાં ફરજ બજાવતા જેલ સહાયક ભરતભાઈ ચાવડા પર ચાર કેદીઓએ જીવલેણ હુમલો કર્યો છે. આ હુમલા પાછળનું કારણ માત્ર એટલું જ હતું કે જેલ કર્મીએ કેદીઓને જેલની અંદર ગાળો બોલવાની ના પાડી હતી.
ગાર્ડનમાંથી ઈંટ ઉપાડી માથામાં ઝીંકી
મળતી માહિતી મુજબ, જેલ સહાયક ભરતભાઈ જ્યારે પોતાની ફરજ પર હતા ત્યારે ચાર કેદીઓ ઉગ્ર ગાળાગાળી કરી રહ્યા હતા. ભરતભાઈએ તેમને અટકાવતા કેદીઓ ઉશ્કેરાઈ ગયા હતા અને ગાર્ડનમાંથી ઈંટના ટુકડા ઉપાડી તેમના માથાના ભાગે ઝીંક્યા હતા. હુમલો એટલો જોરદાર હતો કે ભરતભાઈ લોહીલુહાણ હાલતમાં ઢળી પડ્યા હતા. તેમને તાત્કાલિક સારવાર માટે અમદાવાદ સિવિલ હોસ્પિટલ ખસેડવામાં આવ્યા છે.