Sandesh Digital Explainer : ગુજરાતના મહાનગરોમાં ‘વાઇફ સ્વેપિંગ’નો કાળો ખેલ, પત્નીઓની અદલાબદલીનું આ દૂષણ કેટલું ઊંડું છે?

ગુજરાતના આધુનિક સમાજની પાછળ એક એવો અંધકાર છવાઇ રહ્યો છે, જેની કલ્પના પણ ધ્રુજારી લાવી દે તેવી છે. સુરતમાં તાજેતરમાં જ એક પરણેલી પીડિત યુવતીએ મીડિયા સમક્ષ આવીને જે ખુલાસા કર્યા છે, તેણે સમગ્ર ગુજરાત પોલીસ અને સભ્ય સમાજને હચમચાવી દીધો છે. સુરત બાદ હવે આ ગંદા ખેલના તાર રાજકોટ અને અમદાવાદ સુધી લંબાયેલા હોવાનું સામે આવ્યું છે. આ કોઈ છૂટોછવાયો કિસ્સો નથી, પરંતુ સોશિયલ મીડિયાના માધ્યમથી ચાલતું એક આખું સંગઠિત નેટવર્ક છે.

શું છે આખો મામલો? પીડિતાની આપવીતી

સુરતની એક પરણેલી યુવતીએ તાજેતરમાં જ મીડિયા સમક્ષ હિંમત કરીને પોતાની સાથે થયેલા અન્યાયની કહાની જાહેર કરી હતી. પીડિતાના જણાવ્યા અનુસાર, તેને લગ્નજીવન દરમિયાન ખબર પડી કે તેનો પતિ અન્ય મહિલાઓ સાથે સંબંધ રાખવા ઉપરાંત, પત્નીઓની અદલાબદલી એટલે કે 'વાઇફ સ્વેપિંગ'ના રવાડે ચઢેલો છે. જ્યારે યુવતીએ આ બાબતનો વિરોધ કર્યો, ત્યારે તેને શારીરિક અને માનસિક ત્રાસ આપવામાં આવ્યો.

આ દૂષણ માત્ર સુરત પૂરતું મર્યાદિત નથી

મીડિયામાં આપેલા આ નિવેદન બાદ હવે રોજ નવા અને વધુ ચોંકાવનારા ખુલાસા થઈ રહ્યા છે. આ દૂષણ માત્ર સુરત પૂરતું મર્યાદિત નથી, પરંતુ રાજકોટ અને અમદાવાદમાં પણ ખૂબ મોટા પાયે પગપેસારો કરી ચૂક્યું છે.

સોશિયલ મીડિયા: ગંદી રમતનું હબ

તપાસ અને પીડિતાના દાવાઓ અનુસાર, આ આખો ખેલ ડિજિટલ દુનિયાની આડમાં રમાય છે. સામાન્ય માણસ જે સોશિયલ મીડિયાનો ઉપયોગ સંપર્ક માટે કરે છે, તેનો ઉપયોગ આ વિકૃત માનસિકતા ધરાવતા લોકો પાર્ટનર બદલવા માટે કરે છે. ફેસબુક, ટેલિગ્રામ, ઇન્સ્ટાગ્રામ અને હોટ્સએપ પર કોડેડ લેંગ્વેજ (ગુપ્ત ભાષા) માં ગ્રુપો બનાવવામાં આવે છે. આ ગ્રુપોમાં સામાન્ય વ્યક્તિ સરળતાથી પ્રવેશી શકતી નથી. કપલ હોવાના પુરાવા અને વીડિયો વેરિફિકેશન બાદ જ એન્ટ્રી મળે છે. ગ્રુપના સભ્યો પોતાના પાર્ટનરના ફોટા શેર કરે છે અને મ્યુચ્યુઅલ અન્ડરસ્ટેન્ડિંગથી વીકેન્ડ ગેટ-ટુગેધર કે હોટેલ બુકિંગ પ્લાન કરે છે. પીડિતાના જણાવ્યા મુજબ, આમાં કોઈ એક કે બે કપલ સામેલ નથી, પરંતુ સંખ્યાબંધ કપલો આ આખી સિન્ડિકેટનો હિસ્સો છે અને નિયમિત ધોરણે આવી પ્રવૃત્તિઓ કરે છે.

માત્ર શ્રીમંતો જ નહીં, મધ્યમવર્ગ પણ આ દૂષણમાં હોમાયો

સામાન્ય રીતે એવું માનવામાં આવતું હોય છે કે હાઇ-પ્રોફાઇલ, ખૂબ જ પૈસાદાર અથવા મેટ્રો સિટીઝના કલ્ચરમાં જ આવી પશ્ચિમી વિકૃતિઓ જોવા મળે છે. પરંતુ આ કેસમાં સૌથી મોટો કડાકો એ થયો છે કે આ દૂષણ હવે મધ્યમવર્ગ સુધી પહોંચી ગયું છે.શ્રીમંતો પોતાના અંગત ફાર્મહાઉસ કે લક્ઝરી રિસોર્ટમાં આવી પાર્ટીઓ ગોઠવે છે, જ્યારે મધ્યમ વર્ગના કપલ્સ બજેટ હોટેલો કે અન્ય શહેરોમાં પ્રવાસના નામે આ ગંદી રમત રમતા હોવાનું બહાર આવ્યું છે.

 મોટા શહેરોમાં ફેલાયેલું નેટવર્ક

પીડિતાના નિવેદન બાદ હવે એ સ્પષ્ટ થઈ ગયું છે કે ગુજરાતના ત્રણ મુખ્ય શહેરો આ નેટવર્કનું ત્રિકોણ બની ગયા છે. જ્યાંથી આ ઘટનાનો પર્દાફાશ થયો છે. અહીં ટેક્સટાઇલ અને ડાયમંડ ઉદ્યોગ સાથે સંકળાયેલા હાઇ-પ્રોફાઇલ લોકો શંકાના દાયરામાં છે. તો રંગીલું રાજકોટ કહેવાતા આ શહેરમાં પણ સોશિયલ મીડિયા ગ્રુપ્સ સક્રિય હોવાની ચર્ચા ચાલી રહી છે. શાંત દેખાતા આ શહેરમાં અંદરખાને મોટું રેકેટ ચાલે છે. તો અમદાવાદ: મેગા સિટી હોવાના કારણે અહીં અનામી જળવાઈ રહે છે, જેનો ફાયદો ઉઠાવીને કપલ્સ વીકેન્ડમાં આવી પ્રવૃત્તિઓ કરે છે.

 પરિવારની આબરૂ દાવ પર

આ આખા મામલામાં સૌથી મોટો વળાંક એ છે કે પીડિત યુવતીએ હજુ સુધી આ મામલે પોલીસ સ્ટેશનમાં સત્તાવાર નામજોગ ફરિયાદ નોંધાવી નથી કારણ કે ભારતીય સમાજમાં પત્ની કે મહિલા સાથે જોડાયેલા આવા મુદ્દાઓ બહાર આવતા પરિવારની આબરૂ દાવ પર લાગી જાય છે. ડિજિટલ મીડિયા પર ચાલતા આ રેકેટના પુરાવાઓ આરોપીઓ મિનિટોમાં ડિલીટ કરી નાખતા હોય છે. પીડિતા પર પરિવાર અને સાસરિયા પક્ષ તરફથી કેસ ન કરવા માટે ભારે દબાણ બનાવવામાં આવી રહ્યું હોવાની આશંકા છે. જો કે, પીડિતાએ મીડિયા સમક્ષ આવીને જે હિંમત બતાવી છે, તેના કારણે પોલીસ તંત્ર પણ આંતરિક રીતે સક્રિય થયું છે અને સોશિયલ મીડિયા પર આવા શંકાસ્પદ ગ્રુપો પર સાયબર સેલ દ્વારા વોચ ગોઠવવામાં આવી રહી છે.

સુરતમાં કપલ સ્વેપિંગની ઘટના સામે આવી

સોશિયલ મીડિયા ઇન્ફ્લુએન્સર રાજ પટેલે કર્યો ખુલાસો, મિત્ર વર્તુળમાં ઘટના બન્યા બાદ પર્દાફાશ કર્યો, સમાજ અને સંસ્કૃતિને બદનામ કરવાનું મોટું કારસ્તાન, ફેસબુક ગ્રુપો દ્વારા ઓનલાઈન ચાલી રહ્યું છે નેટવર્ક, ગુજરાતમાં પણ આ દૂષણ વધતા ચિંતા વધી, સમાજને બદનામ કરતી પ્રવૃત્તિ રોકવા કરાઈ અપીલ, અત્યારે નહીં રોકાય તો કુપ્રથા બનવાની આશંકા

સોશિયલ મીડિયા ઇન્ફ્લુએન્સર રાજ પટેલે કાળા કારસ્તાનનો પર્દાફાશ કર્યો

સુરતના જાણીતા સોશિયલ મીડિયા ઇન્ફ્લુએન્સર રાજ પટેલે ડિજિટલ પ્લેટફોર્મ પર એક ગંભીર વીડિયો શેર કરીને રાજ્યમાં ચાલી રહેલા 'કપલ સ્વેપિંગ' ના કાળા કારસ્તાનનો પર્દાફાશ કર્યો છે. છેલ્લા એક અઠવાડિયાથી રાજ પટેલ આ કુપ્રથા સામે સોશિયલ મીડિયાના માધ્યમથી સતત અવાજ ઉઠાવી રહ્યા છે અને લોકોને જાગૃત કરી રહ્યા છે.

 પરિણીત યુગલો પરસ્પર પોતાના પાર્ટનરની અદલાબદલી કરે છે.

રાજ પટેલે ખુલાસો કર્યો હતો કે, તાજેતરમાં જ તેમના મિત્ર વર્તુળમાં આ પ્રકારની એક ચોંકાવનારી ઘટના બની હતી. ત્યારથી તેઓ સમાજમાં આવી અનૈતિક પ્રવૃત્તિ કરનારા તત્વો સામે ખુલ્લેઆમ મેદાને પડ્યા છે. રાજ પટેલના જણાવ્યા અનુસાર, અત્યાર સુધી 'કપલ સ્વેપિંગ' જેવી વિકૃતિઓ માત્ર વિદેશોમાં, ટીવી ચેનલો કે વેબ સિરીઝમાં જ જોવા કે સાંભળવા મળતી હતી, પરંતુ હવે આ દુષણ ગુજરાતના મહાનગરોમાં પણ ખૂબ જ ઝડપથી વધી રહ્યું છે. ફેસબુક અને અન્ય સોશિયલ મીડિયા પ્લેટફોર્મ્સ પર છૂપી રીતે ખાસ ગ્રૂપો બનાવીને આ પ્રકારનું કારસ્તાન ચલાવવામાં આવી રહ્યું છે, જેમાં પરિણીત યુગલો પરસ્પર પોતાના પાર્ટનરની અદલાબદલી કરે છે.

હિન્દુ સંસ્કૃતિ અને પવિત્ર લગ્ન વ્યવસ્થાને સંપૂર્ણપણે બદનામ કરનારી પ્રવૃત્તિ

તેમણે ચિંતા વ્યક્ત કરતા જણાવ્યું કે, આ પ્રવૃત્તિ આપણી ગૌરવશાળી હિન્દુ સંસ્કૃતિ અને પવિત્ર લગ્ન વ્યવસ્થાને સંપૂર્ણપણે બદનામ કરનારી છે. જો અત્યારે આ આધુનિક બદીને રોકવામાં નહીં આવે, તો આવનારા સમયમાં વિકૃત માનસિકતા ધરાવતા લોકો આને એક પરંપરા કે ટ્રેન્ડ બનાવી દેશે." આ ગંભીર મુદ્દો સોશિયલ મીડિયા પર આવતા જ ભારે ચર્ચા જાગી છે. નેટીઝન્સ પણ રાજ પટેલના આ આક્રોશને સમર્થન આપી રહ્યા છે અને માગ કરી રહ્યા છે કે સાયબર ક્રાઈમ અને પોલીસ તંત્રએ આવા ફેસબુક ગ્રૂપો ચલાવનારાઓ વિરુદ્ધ કડક કાનૂની પગલાં ભરવા જોઈએ જેથી આપણું સામાજિક માળખું સુરક્ષિત રહી શકે.

સામાજિક ચિંતા

વાઇફ સ્વેપિંગ એ માત્ર કાયદાકીય ગુનો નથી, પરંતુ નૈતિક અને સામાજિક મૂલ્યોનું અધઃપતન છે. જે લગ્ન સંસ્થાને પવિત્ર માનવામાં આવે છે, તેને આધુનિકતા અને વિકૃતિના નામે કલંકિત કરવામાં આવી રહી છે. જો સમય રહેતા સાયબર ક્રાઇમ અને સ્થાનિક પોલીસ આ સોશિયલ મીડિયા ગ્રુપોના એડમિન અને સભ્યો સુધી નહીં પહોંચે, તો આ દૂષણ કેન્સરની જેમ આખા સમાજને ગળી જશે. પીડિતાએ સત્તાવાર ફરિયાદ નોંધાવવી જરૂરી છે જેથી કરીને કાયદો પોતાનું કામ કરી શકે અને આ કાળા ખેલ પાછળના માસ્ટરમાઇન્ડ જેલના સળિયા પાછળ ધકેલાય. 

કેટલાક કિસ્સાઓમાં પીડિતોએ પોલીસ ફરિયાદ પણ કરેલી છે

અમદાવાદમાં ફરિયાદ નોંધાઇ હતી

થોડા સમય પહેલા અમદાવાદ શહેરના આનંદનગર પોલીસ સ્ટેશનમાં પ્રહલાદનગર વિસ્તારમાં રહેતી પરિણીતાએ તેના પતિ અને તેના મિત્રો વિરુદ્ધમાં વાઇફ સ્વેપિંગનો કેસ નોંધાવ્યો હતો મહિલાએ ફરિયાદમાં તેના પતિના મિત્રોના નામનો ઉલ્લેખ કર્યો છે.પ્રહલાદનગરમાં રહેતી યુવતીને તેના પતિએ પત્નીને હનીમૂન માટે કુલુ મનાલી જવાનું જણાવ્યુ હતું. પત્ની હનીમૂન જવાની વાતથી ખૂબ જ ખુશ હતી પરંતુ તેના પતિની શરત સાંભળીને તે ડઘાઇ ગઇ હતી. તેના પતિએ જણાવ્યું કે તે અને તેના મિત્રો સાથે જશે અને ત્યાં જઇને પત્નીઓ અદલા બદલી કરાશે. મહિલાએ વિરોધ કર્યો તો તેના પતિના મિત્રો અને પત્નીઓ તેમને સમજાવવા આવી હતી.

ધનિક પરિવારની મહિલાએ અમદાવાદમાં ફરિયાદ નોંધાવી હતી

અમદાવાદમાં પણ એક ધનિક પરિવારની મહિલાએ પશ્ચિમ વિસ્તારના પોલીસ સ્ટેશનમાં (મહિલા પોલીસ સ્ટેશન) ફરિયાદ નોંધાવી હતી.જેમાં પતિએ પત્ની સમક્ષ એવી માગણી મૂકી હતી કે તેને તેના મિત્રની પત્ની સાથે શારીરિક સંબંધો બાંધવા છે, અને તેના બદલામાં તેની પત્નીએ પણ તે મિત્ર સાથે સંબંધ રાખવો પડશે. પત્નીએ આ વિકૃત માગણીનો વિરોધ કર્યો તો તેને માર મારવામાં આવ્યો અને ઘરમાંથી કાઢી મૂકવાની ધમકી અપાઈ. આ અંગે મહિલાએ સાસરિયાં અને પતિ વિરુદ્ધ ઘરેલુ હિંસા અને ત્રાસની કાયદેસરની ફરિયાદ કરી હતી.

મુંબઇમાં વાઇફ સ્વેપિંગ હાઈ-પ્રોફાઈલ રેકેટનો પર્દાફાશ 

મુંબઈ પોલીસમાં પણ વાઇફ સ્વેપિંગ હાઈ-પ્રોફાઈલ રેકેટનો પર્દાફાશ થયો હતો.એક પીડિત મહિલાએ આક્ષેપ કર્યો હતો કે તેનો પતિ સોશિયલ મીડિયા ના માધ્યમથી આવા સ્વેપિંગ નેટવર્કમાં સક્રિય હતો. તેણે પત્નીના વાંધાજનક વીડિયો બનાવીને તેને બ્લેકમેલ કરી અન્ય લોકો સાથે સંબંધ બાંધવા મજબૂર કરી હતી. બઈ પોલીસે આ મામલે આઈટી એક્ટ, દુષ્કર્મ અને બ્લેકમેલિંગની કલમો હેઠળ ગુનો નોંધીને પતિ સહિત અન્ય લોકોની ધરપકડ કરી હતી.

આવો બનાવ બિકાનેરની એક મોટી હોટલમાં પણ બન્યો હતો

આવો જ એક કેસ રાજસ્થાનના બિકાનેરની એક મોટી હોટલમાં બન્યો હતો જેની ફરિયાદ ભોપાલમાં નોંધવામાં આવી હતી . પીડિત મહિલાએ ફરિયાદમાં જણાવ્યું કે તેનો પતિ બિકાનેરની એક ફાઈવ સ્ટાર હોટલમાં મેનેજર છે. પતિએ તેણીને હોટલના રૂમમાં બંધ રાખી અને પત્નીની અદલાબદલીની ગેમમાં ભાગ લેવા દબાણ કર્યું હતું.પત્નીની અદલાબદલીની ગેમમાં ભાગ લેવાની ના પાડયા બાદ તેણે  કુદરત વિરુધ્ધનું કૃત્ય આચર્યું હતું. તેમજ નિર્દયતાથી ઢોર માર માર્યો હતો

કેરળમાં પણ સૌથી મોટું કપલ સ્વેપિંગ રેકેટ પકડાયું હતું

કેરળના કોટ્ટયમમાં વર્ષ ૨૦૨૨માં ભારતનું સૌથી મોટું કપલ સ્વેપિંગ રેકેટ પકડાયું હતું, જેમાં હજારો લોકો સોશિયલ મીડિયા ગ્રુપ્સ દ્વારા જોડાયેલા હતા. એક પીડિતાની ફરિયાદના આધારે ત્યાંની પોલીસે આખા નેટવર્કનો પર્દાફાશ કર્યો હતો અને કેરળ મહિલા આયોગે આ અંગે હાઈ-લેવલ તપાસના આદેશ આપ્યા હતા.

કાનૂની જોગવાઈ

ભારતીય કાયદા મુજબ પત્નીની સંમતિ વિના કે સંમતિ સાથે પણ તેને અન્ય વ્યક્તિ સાથે સંબંધ બાંધવા મજબૂર કરવી, વીડિયો બનાવી બ્લેકમેલ કરવા કે ત્રાસ આપવો એ કાયદાકીય રીતે ગુનો બને છે. પીડિત મહિલાઓ આવા કિસ્સામાં મહિલા હેલ્પલાઇન (181 અથવા 112) અથવા નજીકના મહિલા પોલીસ સ્ટેશનનો સંપર્ક કરી શકે છે.

આ પણ વાંચો----     Gujarat Latest News Live : રાજ્યના ખેડૂતો માટે રાહતના સમાચાર, હવે 8 કલાકના બદલે 10 કલાક વીજળી મળશે