અમદાવાદ શહેરમાં અસામાજિક અને વિકૃત માનસિકતા ધરાવતા તત્વોનો આતંક વધી રહ્યો છે. વટવા વિસ્તારમાં બનેલી એક ઘટનાએ સમગ્ર શહેરને હચમચાવી દીધું છે. સોશિયલ મીડિયા પર વાયરલ થયેલા એક કંપારી છૂટી જાય તેવા વીડિયોમાં કેટલાક યુવકો એક સગીર વયના છોકરાને ઝાડ સાથે બાંધીને લાકડીઓ અને પટ્ટા વડે બેરહેમીથી માર મારતા દ્રશ્યમાન થાય છે. આ વીડિયો વાયરલ થતાં જ સ્થાનિક રહેવાસીઓમાં રોષ અને ફફડાટ વ્યાપી ગયો છે.
બચાવવા માટે કરગરતો રહ્યો કિશોર
પ્રાપ્ત વિગતો અનુસાર, આ વાયરલ વીડિયો અમદાવાદના વટવા પંથકનો હોવાનું સામે આવ્યું છે. કોઈ જૂની અદાવત અથવા સામાન્ય બોલાચાલીની અદાવતમાં સગીરના જ મિત્રોએ તેને ધાક-ધમકી આપીને એકાંતવાળી જગ્યાએ બોલાવ્યો હતો. ત્યારબાદ તમામ શખ્સોએ ભેગા મળીને આ સગીરને એક ઝાડ સાથે દોરડા વડે ચુસ્ત રીતે બાંધી દીધો હતો. વીડિયોમાં જોઈ શકાય છે કે સગીર પોતાની જાતને બચાવવા માટે મિત્રો સામે હાથ જોડીને રડી રહ્યો છે અને દયાની ભીખ માંગી રહ્યો છે, છતાં પણ નરાધમ બનેલા મિત્રોનું દિલ પીગળ્યું ન હતું. તેઓએ સગીર પર લાતો અને ડંડા વડે અત્યાચાર ગુજારવાનું ચાલુ રાખ્યું હતું અને આ આખી ઘટનાનો મોબાઈલમાં વીડિયો પણ ઉતાર્યો હતો.