શહેરમાં ટ્રાફિકના નિયમોનું ઉલ્લંઘન કરવાના ગંભીર પરિણામો ફરી એકવાર સામે આવ્યા છે. તાજેતરમાં કેશવબાગ ચાર રસ્તા નજીક અંધજન મંડળ પાસે સર્જાયેલા એક ગમખ્વાર અકસ્માતમાં એક યુવકે પોતાનો જીવ ગુમાવ્યો છે. આ અકસ્માતના સીસીટીવી ફૂટેજ સામે આવ્યા છે, જેમાં મૃતક યુવકની ગફલતભરી ડ્રાઇવિંગ સ્પષ્ટપણે દેખાઈ રહી છે.
અમદાવાદમાં ઓવરસ્પીડથી વધુ એક જીવ ગયો
અકસ્માતમાં મૃત્યુ પામેલા યુવકનું નામ પાર્થ કલાલ હોવાનું જાણવા મળ્યું છે. સીસીટીવી ફૂટેજમાં પાર્થ કલાલ પોતાની બાઇક અતિશય ઝડપે (ઓવરસ્પીડમાં) અને ગફલત ભરી રીતે ચલાવતો સ્પષ્ટપણે કેદ થયો છે. ફૂટેજ પરથી એવું પણ બહાર આવ્યું છે કે અકસ્માત પહેલાં પાર્થ કલાલે કેશવબાગ ચાર રસ્તાનું રેડ સિગ્નલ તોડ્યું હતું અને નિયમોની અવગણના કરીને ચાર રસ્તા ક્રોસ કરવાનો પ્રયાસ કર્યો હતો.
