અમરેલી જિલ્લાના ધારી ગીર પૂર્વ વિસ્તારમાં એક દુઃખદ ઘટના બની છે. ધારી ગીર પૂર્વના કોટડા ગામે એક 8 માસનું સિંહબાળ કૂવામાં ખાબક્યું હતું. વન વિભાગ દ્વારા તેને સફળતાપૂર્વક બહાર કાઢીને સારવાર માટે ખસેડાયું હતું, પરંતુ તેમ છતાં તેનું મૃત્યુ થયું હતું.
કોટડા ગામે 8 માસનું સિંહબાળનું મૃત્યુ
પ્રાપ્ત માહિતી મુજબ, કોટડા ગામમાં ભૂપતભાઈ સોહલીયાની વાડીમાં આવેલા એક કૂવામાં આશરે આઠ માસનું એક સિંહબાળ પડી ગયું હતું. આ અંગે વન વિભાગને જાણ થતાં જ વન વિભાગની ટીમ તાત્કાલિક ઘટનાસ્થળે દોડી ગઈ હતી. વન વિભાગના અધિકારીઓએ અને ટીમે ભારે જહેમત બાદ આ સિંહબાળને કૂવામાંથી સુરક્ષિત રીતે બહાર કાઢ્યું હતું. પાણીમાં પડી જવાના કારણે સિંહબાળની હાલત નાજુક જણાતા તેને તાત્કાલિક સારવાર અર્થે આંબરડી સફારી પાર્ક ખાતે ખસેડવામાં આવ્યું હતું.
