અમરેલી જિલ્લાના ધારી-બગસરા રોડ પર પ્રેમપરા ગામ નજીક ગત 2 એપ્રિલના રોજ સર્જાયેલા એક ભયાનક અકસ્માતમાં ગંભીર રીતે ઇજાગ્રસ્ત થયેલા કાર ચાલકનું સારવાર દરમિયાન મોત નીપજ્યું છે. પુરપાટ ઝડપે જતી અલ્ટો કારના ચાલકે સ્ટીયરિંગ પરથી કાબૂ ગુમાવતા કારે રસ્તા પર ત્રણથી ચાર ગોથા ખાધા હતા, જેના લાઈવ દ્રશ્યો સીસીટીવી કેમેરામાં કેદ થયા છે.
3 થી 4 ગોથા ખાઈને કારનો કચ્ચરઘાણ
મળતી માહિતી મુજબ, બગસરા તાલુકાના સાપર ગામના રહેવાસી કમલેશભાઈ સુદાણી અન્ય બે યુવાનો સાથે અલ્ટો કારમાં જઈ રહ્યા હતા. ધારીના પ્રેમપરા નજીક કારની ઝડપ એટલી વધારે હતી કે ચાલકે અચાનક બેલેન્સ ગુમાવ્યું હતું. કાર રસ્તા પર ફંગોળાઈ હતી અને ફિલ્મી દ્રશ્યોની જેમ 3 થી 4 પલ્ટી ખાઈ ગઈ હતી.
ચાલકનું મોત, અન્ય બેનો ચમત્કારિક બચાવ
અકસ્માત બાદ કારમાં સવાર અન્ય બે યુવાનો સુરક્ષિત રીતે બહાર નીકળી ગયા હતા, પરંતુ ચાલક કમલેશભાઈ સુદાણીને ગંભીર ઇજાઓ પહોંચી હતી. તેમને તાત્કાલિક હોસ્પિટલ ખસેડવામાં આવ્યા હતા, જ્યાં સારવાર દરમિયાન તેમનું ટૂંકી માંદગી બાદ મોત નીપજ્યું છે. આ સમાચારથી સાપર ગામમાં શોકનું મોજું ફરી વળ્યું છે.
CCTVમાં કેદ થઈ રફ્તારની તબાહી
અકસ્માતની સમગ્ર ઘટના નજીકમાં લાગેલા સીસીટીવીમાં કેદ થઈ છે, જેમાં જોઈ શકાય છે કે કઈ રીતે પુરપાટ ઝડપે આવતી કાર સેકન્ડોમાં જ પલટી મારીને રમકડાની જેમ ફંગોળાઈ જાય છે. પોલીસ દ્વારા આ મામલે અકસ્માતનો ગુનો નોંધી આગળની તપાસ હાથ ધરવામાં આવી છે.
આ પણ વાંચો: Rajkot: પોલીસથી બચવા બુટલેગરે 100ની સ્પીડે કાર ભગાવી, નિર્દોષ ટુ-વ્હીલર ચાલકને અડફેટે લેતા કમકમાટીભર્યું મોત
