અમરેલી જિલ્લાના રાજુલા-મહુવા ડુંગર રોડ પર આવેલા રેલવે ફાટક પર આજે એકાએક ગુડ્સ ટ્રેન (માલગાડી) બંધ પડી જવાની ઘટના સામે આવી છે. ટેકનિકલ કારણોસર ટ્રેન બરાબર ફાટક વચ્ચે જ ઉભી રહી જતાં બંને બાજુ વાહનોની લાંબી લાઈનો લાગી ગઈ હતી. આ અચાનક સર્જાયેલી સમસ્યાને કારણે રોડ પરથી પસાર થતા વાહનચાલકો અને મુસાફરો ભારે મુશ્કેલીમાં મુકાયા હતા. ખાસ કરીને ઓફિસ જતાં નોકરિયાતો અને શાળા-કોલેજ જતાં વિદ્યાર્થીઓ સમયસર પહોંચી શક્યા ન હતા, જેના કારણે લોકોમાં રોષ જોવા મળ્યો હતો.
રેલવે ફાટક પર ટ્રેન અચાનક બંધ
આ ઘટનાને પગલે અંદાજે 30 મિનિટ સુધી રેલવે ફાટક બંધ રહ્યો હતો. ટ્રેનના ચાલક અને રેલવેના ટેકનિકલ સ્ટાફ દ્વારા ખામી સુધારવા માટે ત્વરિત પ્રયાસો હાથ ધરવામાં આવ્યા હતા. અડધા કલાકની જહેમત બાદ ટ્રેન ફરી શરૂ થતાં ફાટક ખોલવામાં આવ્યો હતો અને ટ્રાફિક પૂર્વવત્ થયો હતો. જોકે, ટૂંકા ગાળા માટે સર્જાયેલા આ જામને કારણે મુખ્ય માર્ગ પર વાહનોનો મેળો જામ્યો હતો. રેલવે વિભાગ દ્વારા આ પ્રકારની ટેકનિકલ સમસ્યાઓ ભવિષ્યમાં ન સર્જાય તે માટે યોગ્ય તપાસની ખાતરી આપવામાં આવી છે.
