આણંદ જિલ્લાના નાવલી ગામમાં સામાન્ય બોલાચાલીએ હિંસક સ્વરૂપ ધારણ કરતા બે જૂથો વચ્ચે સામસામે અથડામણ થઈ હતી. જાહેરમાં અપશબ્દો બોલવાની ના પાડવા જેવી નાની બાબત પર શરૂ થયેલી તકરારે જોતજોતામાં મોટું સ્વરૂપ લઈ લીધું હતું. મળતી માહિતી મુજબ, ગામમાં બે જૂથના લોકો વચ્ચે જાહેરમાં અપશબ્દો બોલવા મામલે વિવાદ થયો હતો. આ વિવાદ એટલો વધી ગયો કે બંને જૂથના લોકો લાકડીઓ અને અન્ય હથિયારો સાથે સામસામે આવી ગયા હતા. પરિણામે થયેલી આ ઉગ્ર જૂથ અથડામણમાં કુલ 7 જેટલા લોકોને ઈજાઓ પહોંચી હતી.
સામૂહિક હુમલાનો બનાવ
ઘટનાની જાણ થતા જ સ્થાનિક પોલીસે તાત્કાલિક નાવલી પહોંચીને પરિસ્થિતિ પર કાબૂ મેળવ્યો હતો અને ઘાયલોને જરૂરી સારવાર માટે હોસ્પિટલ ખસેડવામાં આવ્યા હતા. પોલીસે આ સમગ્ર ઘટના અંગે બંને જૂથના કુલ 7 લોકો સામે સત્તાવાર ફરિયાદ નોંધીને કાયદેસરની કાર્યવાહી હાથ ધરી છે. પોલીસે વધુ કોઈ અનિચ્છનીય બનાવ ન બને તે માટે ગામમાં ચુસ્ત બંદોબસ્ત ગોઠવીને તપાસનો ધમધમાટ શરૂ કર્યો છે. આ બનાવને પગલે ગામમાં થોડા સમય માટે તંગદિલીનો માહોલ સર્જાયો હતો.
