આણંદ જિલ્લાના ઉમરેઠ તાલુકાના સુરેલી ગામ પાસે આજે એક અત્યંત કરુણ માર્ગ અકસ્માતની ઘટના સામે આવી છે. પુરપાટ ઝડપે જઈ રહેલી બાઇક અચાનક સ્લિપ થઈ જતાં સર્જાયેલા આ અકસ્માતમાં બે યુવાનોએ પોતાના જીવ ગુમાવ્યા છે. આ ઘટનાને પગલે સમગ્ર વિસ્તારમાં ભારે અરેરાટી વ્યાપી ગઈ છે.
આણંદમાં બાઇક સ્લિપ થતા બે મિત્રોના મોત
પ્રાપ્ત માહિતી અનુસાર, સંજયભાઈ ચૌહાણ અને મહેશભાઈ પરમાર નામના બે યુવાનો પોતાની બાઇક પર સુરેલી ગામ નજીકથી પસાર થઈ રહ્યા હતા. તે દરમિયાન અચાનક બાઇક સ્લિપ થઈ જતા બંને યુવાનો રોડ પર ફંગોળાયા હતા. અકસ્માત એટલો ગંભીર હતો કે સંજયભાઈ ચૌહાણનું ઘટનાસ્થળે જ કરુણ મોત નીપજ્યું હતું, જ્યારે ગંભીર રીતે ઘવાયેલા મહેશભાઈ પરમારને સારવાર માટે તાત્કાલિક હોસ્પિટલ ખસેડવામાં આવ્યા હતા. જોકે, સારવાર દરમિયાન મહેશભાઈ પરમારે પણ અંતિમ શ્વાસ લીધા હતા.
