અરવલ્લી જિલ્લાના શામળાજી નજીક આજે એક નાટ્યાત્મક ઘટનામાં સ્ટેટ મોનિટરિંગ સેલ (SMC) ની ટીમ દ્વારા પ્રોહિબિશનના એક આરોપી પર ફાયરિંગ કરવામાં આવ્યું છે. પ્રાપ્ત માહિતી અનુસાર, આરોપી પોલીસની પકડમાંથી ભાગવાનો પ્રયાસ કરી રહ્યો હતો, જેને રોકવા માટે પોલીસે ગોળીબાર કરવો પડ્યો હતો.
SMCની ટીમ દ્વારા આરોપી પર ફાયરિંગ
સ્ટેટ મોનિટરિંગ સેલ (SMC) ની ટીમ પ્રોહિબિશનના એક આરોપીને રાજસ્થાનથી પકડીને ગુજરાત તરફ લાવી રહી હતી. શામળાજીના અણસોલ ગામ પાસે પહોંચતા જ આરોપીએ પોલીસની પકડમાંથી છૂટીને નાસી જવાનો પ્રયાસ કર્યો હતો. સ્થિતિની ગંભીરતા સમજીને પોલીસે આરોપીને રોકવાનો આદેશ આપ્યો હતો, પરંતુ તે માન્યો ન હતો. આ દરમિયાન આરોપીને કસ્ટડીમાંથી ભાગતો રોકવા માટે પોલીસ દ્વારા ફાયરિંગ કરવામાં આવ્યું હતું.