ગુજરાતમાં જ્યાં એક તરફ 'વાંચે ગુજરાત' અને 'ભણે ગુજરાત'ના નારા લગાવવામાં આવે છે, ત્યાં બીજી તરફ અરવલ્લી જિલ્લાના મોડાસાની એક શાળામાં શિક્ષણ જગતને શરમાવી દે તેવી ઘટના સામે આવી છે. મોડાસાની અમલાઈ જૂથ પ્રાથમિક શાળામાં એક શિક્ષક દારૂના નશામાં ચૂર હાલતમાં વર્ગખંડમાંથી ઝડપાયો છે. આ ઘટનાનો વીડિયો સોશિયલ મીડિયામાં વાયરલ થતા સમગ્ર પંથકમાં ચકચાર મચી ગઈ છે.
ખુરશી પર દારૂના નશામાં ધૂત હાલતમાં બેઠેલા જોવા મળ્યો
મળતી વિગતો અનુસાર, શાળાના યશવંત કડિયા નામના શિક્ષક શિક્ષણના ધામ ગણાતી શાળામાં જ નશો કરીને આવ્યો હતો હદ તો ત્યારે થઈ જ્યારે આ શિક્ષક બાળકોને ભણાવવાને બદલે વર્ગખંડમાં ખુરશી પર દારૂના નશામાં ધૂત હાલતમાં બેઠેલા જોવા મળ્યો હતો. નશો એટલો વધારે હતો કે જ્યારે પોલીસને બોલાવવામાં આવી ત્યારે શિક્ષક પોલીસ વાનમાં બેસવાની સ્થિતિમાં પણ નહોતો. પોલીસે નશાખોર શિક્ષકની અટકાયત કરી કાયદેસરની કાર્યવાહી હાથ ધરી છે.
