ગુજરાત અને રાજસ્થાનને જોડતા મુખ્ય હાઈવે પર વહેલી પરોઢે એક ગંભીર અકસ્માત સર્જાતા અફરાતફરીનો માહોલ જોવા મળ્યો હતો. રાજસ્થાનના બીછીવાડા નજીક એક કેમિકલ ભરેલું ટેન્કર પલટી જતાં તેમાંથી સફેદ ગેસ જેવા કેમિકલના ફુવારા ઉડવા લાગ્યા હતા, જેના કારણે વાહનચાલકોમાં ભારે ભય ફેલાયો હતો.
કેમિકલના ફુવારાથી ભયનો માહોલ
ઘટનાની મળતી માહિતી અનુસાર, રાજસ્થાન સરહદમાં બીછીવાડા પાસે ટેન્કરના ચાલકે કાબૂ ગુમાવતા ટેન્કર રસ્તા પર જ પલટી ગયું હતું. અકસ્માત થતાં જ ટેન્કરમાંથી સફેદ રંગના ગેસ અથવા લિક્વિડ કેમિકલના ઊંચા ફુવારા હવામાં ઉડવા લાગ્યા હતા. આ દ્રશ્ય જોઈને હાઈવે પરથી પસાર થતા લોકોમાં દોડધામ મચી ગઈ હતી. ઝેરી ગેસ હોવાની આશંકાએ તકેદારીના ભાગરૂપે પોલીસ દ્વારા તાત્કાલિક ધોરણે બંને તરફનો ટ્રાફિક અટકાવી દેવામાં આવ્યો હતો.
