હાંસોટ-સુરત માર્ગ પર શુક્રવારે એક ગમખ્વાર અકસ્માત સર્જાયો હતો. સુણેવ ગામની સીમમાં ચાલકે સ્ટિયરિંગ પરનો કાબૂ ગુમાવતા એક એમ્બ્યુલન્સ માર્ગ પર જ પલટી મારી ગઈ હતી. આ દુર્ઘટનામાં વાહનમાં સવાર બે લોકોને નાની-મોટી ઈજાઓ પહોંચી હતી.
કંટ્રોલ ગુમાવતા સર્જાયો અકસ્માત
પ્રાપ્ત વિગતો અનુસાર એક એમ્બ્યુલન્સ હાંસોટથી સુરત તરફ જઈ રહી હતી. જ્યારે આ એમ્બ્યુલન્સ સુણેવ ગામ પાસે પહોંચી, ત્યારે અચાનક ચાલકે વાહન પરનો કાબૂ ગુમાવી દીધો હતો. કાબૂ બહાર ગયેલી એમ્બ્યુલન્સ રસ્તા પર પલટી ખાઈ ગઈ હતી. અકસ્માતને પગલે આસપાસના લોકો દોડી આવ્યા હતા અને બચાવ કામગીરી શરૂ કરી હતી.
