ભાવનગરના કુંભારવાડા વિસ્તારમાં લાંબા સમયથી ધમધમતી નકલી ઓઈલ બનાવતી ફેક્ટરી પર લોકલ ક્રાઈમ બ્રાન્ચ (LCB)ની ટીમે સફળ દરોડો પાડીને મોટા કૌભાંડનો પર્દાફાશ કર્યો છે. ચોક્કસ બાતમીના આધારે પોલીસે આ ઓપરેશન પાર પાડ્યું હતું, જેમાં બ્રાન્ડેડ કંપનીઓના નામે બનાવટી ઓઈલ પેક કરીને બજારમાં વેચવાનું ગેરકાયદેસર નેટવર્ક ઝડપાયું છે. આ સમાચાર વાયુવેગે પ્રસરતા શહેરના ઓટોમોબાઈલ અને સ્પેરપાર્ટ્સના વેપારીઓમાં ભારે ફફડાટ વ્યાપ્યો છે.
LCBની ટીમે બાતમીના આધારે પાડ્યા હતા દરોડા
દરોડા દરમિયાન પોલીસને મોટી માત્રામાં ભેળસેળિયું ઓઈલ, નામચીન કંપનીઓના ખાલી ડબ્બા, સ્ટીકરો અને પેકિંગ માટેના સાધનો મળી આવ્યા છે. LCBની ટીમ હાલમાં મુદ્દામાલની ઝીણવટભરી ગણતરી કરી રહી છે અને કેટલા લિટર ઓઈલનો જથ્થો તૈયાર કરવામાં આવ્યો હતો તેની તપાસ ચાલી રહી છે. પ્રાથમિક અંદાજ મુજબ લાખોની કિંમતનો મુદ્દામાલ જપ્ત કરવામાં આવ્યો છે. તપાસમાં એ પણ સામે આવ્યું છે કે આ નકલી ઓઈલને અસલી બતાવીને ગ્રાહકો સાથે મોટી છેતરપિંડી કરવામાં આવતી હતી.
