ભાવનગર શહેરમાં મોડી રાત્રે ગોઝારો અકસ્માત સર્જાયો છે. શહેરના રિંગ રોડ પર આવેલા શ્રીજી પાર્ટી પ્લોટની સામેથી એક બાઇક પર સવાર બે યુવકો પસાર થઈ રહ્યા હતા. આ દરમિયાન પાછળથી આવી રહેલી એક બેફામ અને પુરપાટ ઝડપે દોડતી કારના ચાલકે બાઇકને જોરદાર ટક્કર મારી હતી. કારની સ્પીડ એટલી વધારે હતી કે બાઇક સવારોને ફંગોળ્યા બાદ કાર ચાલકે સ્ટીયરિંગ પરથી કાબૂ ગુમાવી દીધો હતો અને કાર રોડની સાઇડમાં ઊભેલા એક બંધ ટેન્કરની પાછળ ધડાકાભેર ઘૂસી ગઈ હતી.
ધડાકો સાંભળી લોકો દોડી આવ્યા
મધરાતે સર્જાયેલા આ અકસ્માતનો અવાજ એટલો ભયાનક અને પ્રચંડ હતો કે આસપાસના સ્થાનિક રહીશો અને રાહદારીઓ તાત્કાલિક ઘટનાસ્થળે દોડી આવ્યા હતા. જોતજોતામાં ત્યાં લોકોના ટોળેટોળા એકત્ર થઈ ગયા હતા. કાર અને બાઇકનો કુરચો બોલી ગયો હતો. સ્થાનિક લોકોએ સમય સૂચકતા વાપરી તુરંત જ 108 ઇમરજન્સી એમ્બ્યુલન્સને જાણ કરી હતી, જેના કારણે ટીમ ઘટનાસ્થળે પહોંચી હતી અને લોહીલુહાણ હાલતમાં ત્રણેય ઇજાગ્રસ્તોને બહાર કાઢ્યા હતા.
