ભાવનગર શહેરમાં ગુનાખોરી મુક્ત વાતાવરણ તૈયાર કરવા અને અસામાજિક તત્વોની શાન ઠેકાણે લાવવા માટે ભાવનગર પોલીસ વિભાગે કમર કસી છે. શહેરના ખેડૂતવાસ વિસ્તારમાં અગાઉ શરીર સંબંધી ગંભીર ગુનાઓ (જેવા કે મારામારી, હુમલો વગેરે) માં સંડોવાયેલા તત્વો ફરી માથું ન ઉચકે તે માટે પોલીસ અને પીજીવીસીએલની ટીમે સંયુક્ત રીતે મેગા ઓપરેશન હાથ ધર્યું હતું. આ ઓપરેશન એટલું ગુપ્ત રાખવામાં આવ્યું હતું કે વહેલી સવારે જ્યારે આખો કાફલો વિસ્તારમાં ઉતર્યો ત્યારે સ્થાનિક તત્વોમાં ભારે ફફડાટ વ્યાપી ગયો હતો.
વિશાળ કાફલા સાથે 24 ઘરોમાં સર્ચ ઓપરેશન
ભાવનગર પોલીસના ઉચ્ચ અધિકારીઓના માર્ગદર્શન હેઠળ ૨ પીઆઈ (PI), 5 પીએસઆઈ (PSI) અને 40 જેટલા હથિયારધારી તથા સામાન્ય પોલીસ કર્મચારીઓની એક ટુકડીએ ખેડૂતવાસમાં ધામા નાખ્યા હતા. પોલીસે આ વિસ્તારના ચિહ્નિત થયેલા અને ગુનાહિત ઇતિહાસ ધરાવતા ૨૪ જેટલા શખ્સોના રહેઠાણ પર એકસાથે સર્ચ અને કોમ્બિંગ ઓપરેશન શરૂ કર્યું હતું. આ કાર્યવાહીનો મુખ્ય ઉદ્દેશ્ય ગુનાખોરી પર નિયંત્રણ મેળવવાનો અને સ્થાનિક રહીશોમાં સુરક્ષાની ભાવના મજબૂત કરવાનો હતો.