બોટાદ જિલ્લાના બરવાળા તાલુકાના રામપરા ગામમાં બાળકોની રમત જેવી સામાન્ય બાબતે મોટું સ્વરૂપ ધારણ કર્યું છે. રામપરા ગામમાં બાળકો વચ્ચે રમવાની બાબતમાં થયેલી તકરાર બાદ એક જ સમાજના બે પક્ષો આમને-સામને આવી ગયા હતા. આ બોલાચાલી જોતજોતામાં હિંસક અથડામણમાં ફેરવાઈ ગઈ હતી અને બંને પક્ષોએ એકબીજા પર હુમલો કર્યો હતો.

લાકડા અને ધોકા વડે ધીંગાણું

ઘટનાના જે વીડિયો સોશિયલ મીડિયા પર સામે આવ્યા છે તે જોઈને હચમચી જવાય તેવા દ્રશ્યો છે. વીડિયોમાં સ્પષ્ટ જોઈ શકાય છે કે લોકો એકબીજા પર લાકડાના ફટકા અને ધોકા વડે તૂટી પડ્યા છે. જાહેરમાં થયેલા આ ધીંગાણાને પગલે અફરાતફરીનો માહોલ સર્જાયો હતો. આ મારામારીમાં બંને જૂથના એક-એક વ્યક્તિને ગંભીર ઈજાઓ પહોંચી હોવાનું જાણવા મળ્યું છે.

ઇજાગ્રસ્તોને હોસ્પિટલ ખસેડાયા

હિંસક હુમલામાં ઘવાયેલા કુલ બે લોકોને તાત્કાલિક અસરથી સારવાર માટે નજીકની હોસ્પિટલમાં ખસેડવામાં આવ્યા છે. લોહીલુહાણ હાલતમાં ઇજાગ્રસ્તોને સારવાર આપવામાં આવી રહી છે. બીજી તરફ, ઘટનાની જાણ થતા જ બરવાળા પોલીસનો કાફલો રામપરા ગામે દોડી ગયો હતો. પોલીસે હાલમાં બંને પક્ષોની ફરિયાદ લેવાની તજવીજ હાથ ધરી છે અને ગામમાં ફરી શાંતિ સ્થપાય તે માટે બંદોબસ્ત ગોઠવી દીધો છે.



આ પણ વાંચો----    Ahmedabad : 34 વર્ષ પછી કબરમાંથી બોલી લાશ, વટવાના જે મકાનને લોકો ભૂતિયુ માનતા હતા ત્યાંથી ખુલ્યું મર્ડર મિસ્ટ્રીનું રહસ્ય!