નવસારી જિલ્લાના ચીખલી તાલુકાના ખાંભડા ગામે દીપડાના હુમલાની ઘટના સામે આવી છે. ખેતરમાં રોજિંદા કામ માટે ગયેલા એક વૃદ્ધ ખેડૂત પર દીપડાએ ઓચિંતો હુમલો કરી દેતા તેઓ ગંભીર રીતે ઇજાગ્રસ્ત થયા છે. આ ઘટનાને પગલે સ્થાનિક ખેડૂતો અને રહીશોમાં ભારે ફફડાટ વ્યાપી ગયો છે.
ખેતરમાં કામ કરતી વખતે ત્રાટક્યો દીપડો
મળતી માહિતી મુજબ, ખાંભડાના કણબીવાડ વિસ્તારમાં રહેતા 73 વર્ષીય નટુ પટેલ આજે પોતાના ખેતરમાં કામ કરી રહ્યા હતા. આ દરમિયાન ઝાડીઓમાં છુપાયેલા દીપડાએ અચાનક તેમના પર હુમલો કર્યો હતો. દીપડાએ નટુ પટેલના પેટ અને થાપાના ભાગે જોરદાર પંજા મારતા તેઓ લોહીલુહાણ થઈ ગયા હતા. વૃદ્ધની બૂમો સાંભળીને આસપાસના લોકો દોડી આવતા દીપડો નાસી છૂટ્યો હતો.
