દાહોદ જિલ્લાના સરહદી અને જંગલ વિસ્તારને અડીને આવેલા ગરબાડા તાલુકાના પાચવાડા ગામમાંથી એક અત્યંત ચકચારી ઘટના સામે આવી છે. અહીં ખેતરમાં દૈનિક કામકાજ કરી રહેલા સ્થાનિક ગ્રામજનો પર એક દીપડાએ પાછળથી આવીને હિંસક હુમલો કરી દીધો હતો. આ ઓચિંતા હુમલામાં કુલ ત્રણ લોકો ઇજાગ્રસ્ત થયા છે, જેમાંથી બે નાગરિકોની સ્થિતિ ગંભીર હોવાનું જાણવા મળી રહ્યું છે.
પાછળથી ત્રાટક્યો દીપડો, બુમાબુમ થતાં ભાગ્યો
સ્થાનિક સૂત્રો પાસેથી મળતી માહિતી અનુસાર, પાચવાડા ગામના ખેતરમાં જ્યારે લોકો કામ કરી રહ્યા હતા, ત્યારે જંગલમાંથી શિકારની શોધમાં એક દીપડો ત્યાં ધસી આવ્યો હતો. દીપડાએ પાછળથી આવીને એક વ્યક્તિ પર તરાપ મારી હતી. હુમલો થતાં જ ભોગ બનનારે જોરજોરથી બુમાબુમ અને ચીસાચીસ કરી મૂકી હતી. આ અવાજ સાંભળી આસપાસના ખેતરોમાંથી અન્ય લોકો પણ લાકડીઓ લઈને દોડી આવ્યા હતા. લોકોનું ટોળું એકઠું થઈ જતાં આખરે દીપડો ત્યાંથી ભાગીને નજીકના ગાઢ જંગલમાં સરકી ગયો હતો.