ગુજરાતમાં દારૂબંધીના કાયદાની કડક અમલવારી કરાવવા માટે સ્ટેટ મોનિટરિંગ સેલ (SMC) ની ટીમ સતત એક્ટિવ છે, ત્યારે ખેડા જિલ્લાના ડાકોર પોલીસ સ્ટેશનની હદમાં સ્થાનિક સ્ટાફની ઘોર લાપરવાહી અને શંકાસ્પદ ભૂમિકા સરાજાહેર થઈ છે. ગત ૧૭ તારીખે ગાંધીનગર વિજિલન્સની ટીમને સચોટ બાતમી મળી હતી કે ડાકોરના સીમલજ ગામની સીમમાં મોટા પાયે વિદેશી દારૂનું કટિંગ થઈ રહ્યું છે અને ત્યાંથી બુટલેગરો માલ સપ્લાય કરવાના છે. આ બાતમીના આધારે એસએમસીની ટીમે વોચ ગોઠવી હતી.
સ્કૂલ કેમ્પસમાં ઘુસાડી દીધી દારૂ ભરેલી ગાડીઓ
વિજિલન્સની ટીમે જ્યારે શંકાસ્પદ વાહનોને રોકવાનો પ્રયાસ કર્યો ત્યારે બુટલેગરોના સાગરીતોએ વાહનો ઉભા રાખવાને બદલે પૂરપાટ ઝડપે ભગાવ્યા હતા. એસએમસીના જવાનોએ ફિલ્મી ઢબે દારૂ ભરેલી ગાડીઓનો પીછો કર્યો હતો. પકડાઈ જવાના ડરે દારૂ ભરેલી સ્વિફ્ટ અને ઇકો કારના ચાલકોએ ચાલુ વાહનો સીમલજ ગામની સરકારી પ્રાથમિક શાળાના કમ્પાઉન્ડમાં ઘુસાડી દીધા હતા અને વાહનો મૂકીને નાસી છૂટ્યા હતા. પોલીસે બંને વાહનોની તલાશી લેતા તેમાંથી મોટી માત્રામાં વિદેશી દારૂનો જથ્થો મળી આવ્યો હતો, જે પોલીસે કબજે કર્યો હતો.
