દમણના દરિયાકિનારે આજે વહેલી સવારે આગની એક ઘટના બનતા ભારે દોડધામ મચી ગઈ હતી. દમણના લાઈટ હાઉસ નજીક દરિયાકિનારે લંગારીને રાખવામાં આવેલી એક બોટમાં અચાનક આગ ફાટી નીકળી હતી, જેને પગલે સ્થાનિક માછીમારો અને તંત્રમાં ફફડાટ ફેલાયો હતો.
બોટમાં અચાનક આગ ફાટી નીકળી
મળતી માહિતી મુજબ, આજે વહેલી સવારે જ્યારે દરિયાકિનારે શાંતિ હતી, ત્યારે લાઈટ હાઉસ પાસે લંગારેલી એક બોટમાંથી અચાનક ધુમાડાના ગોટેગોટા નીકળવા લાગ્યા હતા અને જોતજોતામાં આગે વિકરાળ સ્વરૂપ ધારણ કરી લીધું હતું. વહેલી સવારે લાગેલી આ આગને જોઈ દરિયાકિનારે હાજર માછીમારો તાત્કાલિક બોટ બચાવવા માટે ઘટનાસ્થળે દોડી આવ્યા હતા.