રાજકોટ જિલ્લાના ધોરાજી-પોરબંદર નેશનલ હાઇવે પર મોટરસાયકલ પર જોખમી સ્ટંટ કરીને પોતાના જીવની અને અન્ય વાહનચાલકોની સલામતી જોખમમાં મૂકતા એક યુવકને ધોરાજી તાલુકા પોલીસે ઝડપી પાડ્યો છે. યુવક દ્વારા કરવામાં આવેલા આ જોખમી સ્ટંટનો વીડિયો સોશિયલ મીડિયા પર વાયરલ થતાં પોલીસ તંત્ર હરકતમાં આવ્યું હતું.
ધોરાજીમાં યુવકને બાઈક પર સ્ટંટબાજી મોંઘી પડી
ધોરાજીના નેશનલ હાઇવે પર લાંબા સમયથી અમુક સ્ટંટબાજો મોટરસાયકલ પર અવારનવાર જોખમી સ્ટંટ કરી તેના વીડિયો બનાવી સોશિયલ મીડિયા પર અપલોડ કરતા હોય છે. આ પ્રકારના વીડિયો વાયરલ થયા બાદ જ પોલીસ તંત્ર પગલાં લે છે.તાજેતરમાં, ધોરાજીના પોરબંદર નેશનલ હાઇવે પર એક યુવક દ્વારા કરવામાં આવેલા જોખમી સ્ટંટનો વીડિયો ખૂબ વાયરલ થયો હતો. આ વીડિયોમાં સ્પષ્ટપણે જોઈ શકાતું હતું કે યુવક બેફામ અને બેદરકારીભર્યું ડ્રાઇવિંગ કરી ટ્રાફિકના નિયમોનું ઉલ્લંઘન કરી રહ્યો હતો, જે હાઇવે પર અકસ્માતનું કારણ બની શકે તેમ હતું.
