ધોરાજી તાલુકામાં વાતાવરણમાં આવેલા અચાનક પલટા અને કમોસમી વરસાદે જનજીવન પ્રભાવિત કર્યું છે. ધોરાજીથી પાટણવાવ તરફ જતાં મુખ્ય માર્ગ પર ભારે પવન સાથે પડેલા વરસાદને કારણે માર્ગની બંને બાજુએ આવેલા અનેક ઘટાદાર વૃક્ષો ધરાશાયી થયા હતા, જેના કારણે વાહનવ્યવહાર સંપૂર્ણપણે ખોરવાઈ ગયો હતો.
સેવાભાવી સંસ્થાઓની ત્વરિત કામગીરી
ઘટનાની જાણ થતા જ મોટી મારડ ગામના આગેવાનો અને સ્થાનિક સેવાભાવી સંસ્થાઓ તાત્કાલિક મદદે દોડી આવ્યા હતા. મુખ્ય માર્ગ પર મોટા વૃક્ષો પડવાને કારણે વાહનોની લાંબી કતારો લાગી હતી અને ટ્રાફિકની ગંભીર સમસ્યા સર્જાઈ હતી. આ પરિસ્થિતિમાં ગ્રામીણ આગેવાનોએ વ્યક્તિગત રસ દાખવી જેસીબી (JCB) મશીનની વ્યવસ્થા કરી હતી.