દેવભૂમિ દ્વારકા જિલ્લામાં સરકારી જમીન પર થયેલા ગેરકાયદેસર દબાણોને દૂર કરવા માટે તંત્ર દ્વારા કડક કાર્યવાહી હાથ ધરવામાં આવી છે. આજે વહેલી સવારથી દ્વારકા તાલુકાના આરંભડા વિસ્તારમાં વહીવટી તંત્ર દ્વારા મેગા ડિમોલિશનની કામગીરી શરૂ કરવામાં આવી હતી, જેમાં કરોડોની કિંમતની સરકારી જમીન દબાણમુક્ત કરવામાં આવી છે.
સર્વે નંબર 58માં બુલડોઝર ફરી વળ્યું
ઘટનાની મળતી માહિતી અનુસાર, આરંભડા વિસ્તારમાં આવેલા બિન આકારી સર્વે નંબર 58માં લાંબા સમયથી ગેરકાયદેસર રીતે દબાણ કરવામાં આવ્યું હતું. અહીં અંદાજિત 2140 ચોરસ મીટર જેટલી વિશાળ જમીન પર ધાર્મિક તથા અન્ય વાણિજ્યિક બાંધકામો ખડકી દેવામાં આવ્યા હતા. તંત્ર દ્વારા આ તમામ ગેરકાયદે બાંધકામો પર બુલડોઝર ફેરવી દેવામાં આવ્યું છે.