ગાંધીનગર મહાનગરપાલિકામાં મહત્વના ગણાતા ચીફ ફાયર ઓફિસરના પદ પર નિમણૂક પ્રક્રિયા લાંબા સમયથી વિવાદો અને વિલંબના વમળમાં ફસાઈ છે. ગુજરાત જાહેર સેવા આયોગ (GPSC) દ્વારા આ જગ્યા ભરવા માટે જરૂરી ભરતી પ્રક્રિયા પૂર્ણ કરવામાં આવી હોવા છતાં, હજુ સુધી કોઈ કાયમી ઉમેદવાર આ પદ પર કાર્યરત થઈ શક્યો નથી. GPSC દ્વારા આ પદ માટે ઓમ જાડેજાના નામની ભલામણ કરવામાં આવી હતી, પરંતુ વહીવટી કારણોસર તેમની નિમણૂક થઈ શકી નથી.
GPSC ભરતી કરી છતાં ઉમેદવાર ન આવ્યા
નવીનતમ વિગતો મુજબ, આ જગ્યા ભરવા માટે GPSC દ્વારા બે વાર વેઇટિંગ લિસ્ટ પણ જાહેર કરવામાં આવ્યું છે. આમ છતાં, પાત્રતા ધરાવતા અથવા જોડાવા ઈચ્છુક ઉમેદવાર ન મળવાને કારણે તંત્ર મુંઝવણમાં મુકાયું છે. સામાન્ય રીતે સરકારી નોકરીઓ માટે પડાપડી થતી હોય છે, ત્યારે આ કિસ્સામાં વેઇટિંગ લિસ્ટ ખોલવા છતાં કોઈ ઉમેદવાર ન આવતા અનેક તર્ક-વિતર્ક સર્જાઈ રહ્યા છે. આ સમગ્ર વિલંબ પાછળનું મુખ્ય કારણ કોર્ટ મેટર હોવાનું પણ સામે આવ્યું છે.
