ગાંધીનગરમાં CM ભૂપેન્દ્ર પટેલની અધ્યક્ષતામાં આજે સવારે 10 વાગ્યે કેબિનેટની બેઠક યોજાવાની છે. આ બેઠકનો મુખ્ય એજન્ડા રાજ્યના વહીવટી અને નીતિગત નિર્ણયો પર કેન્દ્રિત રહેશે. કેબિનેટ બેઠકનો સૌથી મહત્વનો મુદ્દો લગ્ન નોંધણીના નવા ડ્રાફ્ટ નિયમો છે, જે કાયદા વિભાગ દ્વારા તૈયાર કરવામાં આવ્યા છે. આ નવા નિયમોને કેબિનેટમાં મંજૂરી માટે મૂકવામાં આવશે. મંજૂરી મળ્યા બાદ તેના અમલીકરણની પ્રક્રિયા અને સમયરેખા પર વિગતવાર ચર્ચા કરવામાં આવશે. આ નિયમોનું અમલીકરણ રાજ્યમાં લગ્ન નોંધણીની પ્રક્રિયાને વધુ સુવ્યવસ્થિત અને સરળ બનાવશે તેવી અપેક્ષા છે.
આગામી વાયબ્રન્ટ સમિટની તૈયારીઓ
રાજ્ય સરકારના આગામી મોટા આયોજન, વાયબ્રન્ટ ગુજરાત ગ્લોબલ સમિટની તૈયારીઓની સમીક્ષા આ બેઠકમાં કરવામાં આવશે. અત્યાર સુધીની તૈયારીઓ, રોકાણની સંભાવનાઓ અને સમિટને સફળ બનાવવા માટેના અંતિમ આયોજનો પર CM અને મંત્રીઓ ચર્ચા કરશે. તાજેતરમાં અંબાજી ખાતે બનેલી ઘટના અંગે પણ કેબિનેટમાં ચર્ચા કરવામાં આવશે. સરકાર આ ઘટનાના તમામ પાસાઓની સમીક્ષા કરશે અને ભવિષ્યમાં આવા બનાવો ન બને તે માટે જરૂરી નીતિગત અને વહીવટી પગલાં લેવા પર વિચારણા કરી શકે છે.