ગુજરાતમાં 2027ની વસતી ગણતરી માટે તૈયારીઓ પૂરજોશમાં ચાલી રહી છે. કેન્દ્ર સરકારની સૂચના અનુસાર, 20 એપ્રિલથી રાજ્યમાં હાઉસ લિસ્ટિંગની કામગીરી શરૂ થશે. હાઉસ લિસ્ટિંગ દરમિયાન દરેક મકાન અને રહેણાંક એકમની માહિતી મેળવવામાં આવશે. આ પ્રક્રિયા અંતર્ગત પ્રથમ ડોર ટુ ડોર ગણતરી શરૂ થવા પહેલા લોકોને સ્વ-ગણતરી કરવાની તક આપવામાં આવશે.આ હાઉસ લિસ્ટિંગ પ્રક્રિયા 1 એપ્રિલ 2026થી શરૂ થઈ 30 સપ્ટેમ્બર 2026 સુધી સમગ્ર દેશમાં કરવામાં આવશે. ગુજરાતમાં આ પ્રક્રિયા 19 મે સુધી ચાલુ રહેશે અને તમામ માહિતી સંગ્રહિત કરવામાં આવશે.
એપ્લિકેશનના માધ્યમથી વ્યક્તિએ માહિતી આપવી પડશે.
ગુજરાતમાં વસતી ગણતરીની પ્રક્રિયા અંગે ડિરેક્ટર ઓફ સેન્સસ ઓપરેશન સુજલ માયાત્રાની સંદેશ ન્યૂઝ સાથે ખાસ વાતચીત થઈ હતી. જેમાં તેમણે કહ્યું હતું કે, વસ્તી ગણતરીની તૈયારી બહુ પહેલા થઈ હતી. ગુજરાતમાં બે ભાગમાં જનગણના થશે, પહેલા તબક્કામાં ઘરની ગણતરી થશે જ્યારે બીજા તબક્કામાં વસતીની ગણતરી કરવામાં આવશે. ઘરની ગણતરી માટે 33 સવાલોના જવાબો આપવા પડશે. પહેલા તબક્કામાં લોકો સાથે કોઈ ચર્ચા નહીં થાય. ભારત સરકારે સેલ્ફ ઈન્યુમરેશનની જોગવાઈ કરી છે. એપ્લિકેશનના માધ્યમથી વ્યક્તિએ માહિતી આપવી પડશે. સેન્સસ એક્ટ મુજબ ખોટી માહિતી આપવી ગુનો બનશે. માહિતીના આધારે આગામી 10 વર્ષ માટે દેશની દિશા ચોક્કસ બનશે.
