ગુજરાતના પાટનગર ગાંધીનગરને સ્માર્ટ અને ગ્રીન સિટી બનાવવાના આયોજન હેઠળ આજે વધુ એક મોટું કદમ ઉઠાવવામાં આવ્યું છે. ગાંધીનગર મહાનગરપાલિકા દ્વારા આયોજિત એક ભવ્ય કાર્યક્રમમાં કેન્દ્રીય ગૃહ અને સહકાર મંત્રી અમિત શાહના હસ્તે કરોડો રૂપિયાના વિકાસકામોની ભેટ જનતાને સમર્પિત કરવામાં આવી છે. ગૃહમંત્રીએ ગાંધીનગરમાં કુલ 620 કરોડ રૂપિયાના વિવિધ વિકાસલક્ષી કાર્યોનું લોકાર્પણ અને ખાતમુહૂર્ત કર્યું છે.
સેક્ટર-1ને મળી ગ્રીન ભેટ: ભવ્ય ઓક્સિજન પાર્ક ખુલ્લો મુકાયો
આ કાર્યક્રમના મુખ્ય આકર્ષણ તરીકે ગાંધીનગરના સેક્ટર-1માં નવનિર્મિત અદ્યતન બગીચો નાગરિકો માટે ખુલ્લો મુકવામાં આવ્યો છે. કેન્દ્રીય ગૃહમંત્રી અમિત શાહે રિબન કાપીને આ ગ્રીન સ્પેસનું લોકાર્પણ કર્યું હતું. આ નવો બગીચો માત્ર મનોરંજનનું કેન્દ્ર જ નહીં, પરંતુ શહેરના ફેફસાં સમાન 'ઓક્સિજન પાર્ક' તરીકે કામ કરશે.
19,038 ચોરસ મીટરમાં ફેલાયેલો છે નવો બગીચો
ગાંધીનગર મહાનગરપાલિકા દ્વારા આ ઓક્સિજન પાર્કને વિશાળ જગ્યામાં તૈયાર કરવામાં આવ્યો છે. કુલ 19,038 ચોરસ મીટર વિસ્તારમાં ફેલાયેલા આ ગાર્ડનમાં સેંકડોની સંખ્યામાં વૃક્ષો વાવવામાં આવ્યા છે, જે સ્થાનિક પર્યાવરણને શુદ્ધ રાખવામાં મદદ કરશે. આ બગીચામાં વોકિંગ ટ્રેક, બાળકો માટે રમત-ગમતના સાધનો, સિનિયર સિટિઝન્સ માટે બેઠક વ્યવસ્થા અને આકર્ષક લેન્ડસ્કેપિંગ તૈયાર કરવામાં આવ્યું છે.
રૂ. 620 કરોડના કામોથી બદલાશે ગાંધીનગરની હાઇવે અને આંતરમાળખાકીય સુવિધાઓ
આ પ્રસંગે ગૃહમંત્રી અમિત શાહે જણાવ્યું હતું કે, ગાંધીનગર સંસદીય મતવિસ્તારને દેશનો સૌથી વિકસિત અને હરિયાળો વિસ્તાર બનાવવો એ અમારો સંકલ્પ છે. GMCના રૂ. 620 કરોડના ખર્ચે થનારા લોકાર્પણ અને ખાતમુહૂર્તના કામોમાં ડ્રેનેજ લાઈન, સ્માર્ટ રોડ પ્રોજેક્ટ્સ, પીવાના પાણીની સુવિધા અને સ્ટ્રીટ લાઈટ જેવા જનસુખાકારીના અનેક કામોનો સમાવેશ થાય છે. આ પ્રોજેક્ટ્સ પૂર્ણ થતાં જ પાટનગરના નાગરિકોનું જીવનધોરણ વધુ સુવિધાજનક બનશે.
આ પણ વાંચો - Gandhinagar News: દર્દીના હિતમાં બેદરકારી દાખવનાર વિસનગરના જુનિયર ફાર્માસિસ્ટની કચ્છમાં બદલી
