ગુજરાત શિક્ષણ વિભાગે વહીવટી પ્રક્રિયાને વધુ આધુનિક અને વેગવંતી બનાવવા માટે એક ઐતિહાસિક નિર્ણય લીધો છે. હવેથી જિલ્લા સ્તરની તમામ કચેરીઓ અને જિલ્લા શિક્ષણાધિકારીઓએ (DEO) કોઈપણ ફાઇલ કે પત્ર વ્યવહાર ભૌતિક રીતે કરવાને બદલે ફરજિયાતપણે 'ઇ-સરકાર' પોર્ટલના માધ્યમથી જ કરવાનો રહેશે. શિક્ષણ વિભાગ દ્વારા આ અંગે સ્પષ્ટ સૂચના જારી કરવામાં આવી છે કે આવતીકાલથી જ આ આદેશનું કડક પાલન કરવાનું રહેશે. આ ડિજિટલ પહેલનો મુખ્ય હેતુ સરકારી કામકાજમાં થતો વિલંબ ઘટાડવાનો અને ફાઇલોનું ટ્રેકિંગ સરળ બનાવવાનો છે.
વહીવટી પ્રક્રિયામાં આવશે વેગ
જોકે, વ્યવહારુ મુશ્કેલીઓને ધ્યાનમાં રાખીને શિક્ષણ વિભાગે કેટલીક બાબતોમાં આંશિક મુક્તિ આપી છે. કર્મચારીઓની સર્વિસ બુક અને તબીબી સારવારને લગતી ફાઇલો (મેડિકલ બિલ્સ) હજુ પણ ફિઝિકલ સ્વરૂપે સ્વીકારવામાં આવશે, કારણ કે તેમાં અસલ દસ્તાવેજોની ચકાસણી અનિવાર્ય હોય છે. આ સિવાયના તમામ શૈક્ષણિક અને વહીવટી પ્રસ્તાવો હવે ઓનલાઇન માધ્યમથી જ મોકલવાના રહેશે. આ નિર્ણયથી પેપરની બચત થશે અને જિલ્લા સ્તરેથી આવતી ફાઇલો પર ગાંધીનગરથી ત્વરિત નિર્ણય લઈ શકાશે, જેનાથી હજારો શિક્ષકો અને શૈક્ષણિક કર્મચારીઓના પ્રશ્નોનું વહેલું નિરાકરણ આવશે.