હવામાન વિભાગની આગાહી વચ્ચે ગીર સોમનાથ જિલ્લાના વાતાવરણમાં અચાનક પલટો જોવા મળ્યો છે. ગીર સોમનાથ જિલ્લાના કોડીનાર અને સુત્રાપાડા તાલુકાના અનેક ગ્રામ્ય વિસ્તારોમાં કમોસમી વરસાદ ખાબકતા ખેડૂતોના જીવ અદ્ધર થઈ ગયા છે. શિયાળાની વિદાય અને ઉનાળાના આગમન પૂર્વે પડેલા આ વરસાદે જગતના તાતની મહેનત પર પાણી ફેરવી દીધું છે. કમોસમી વરસાદને કારણે ખેડૂતોની ચિંતામાં વધારો થયો છે.
કોડીનાર અને સુત્રાપાડાના ગામોમાં વરસાદ
કોડીનાર તાલુકાના અરણેજ, સિંધાજ, વડનગર, કંટાળા તેમજ સુત્રાપાડા તાલુકાના ભુવાવાડા, ભુવાટીંબી, ગીર વિઠ્ઠલપુર સહિતના ગ્રામ્ય વિસ્તારોમાં અચાનક આકાશ વાદળોથી ઘેરાયું હતું અને જોરદાર ઝાપટાં પડ્યા હતા. કમોસમી વરસાદને કારણે માર્ગો પર પાણી ફરી વળ્યા હતા અને વાતાવરણમાં ઠંડક પ્રસરી ગઈ હતી, પરંતુ આ ઠંડક ખેડૂતો માટે ચિંતાની ગરમી લઈને આવી છે.
પાકોમાં મોટા પાયે નુકસાનની આશંકા
કમોસમી વરસાદને કારણે ખેતરોમાં ઉભા પાકને વ્યાપક નુકસાન થવાની ભીતિ સેવાઈ રહી છે. ખાસ કરીને ગીરની પ્રખ્યાત કેસર કેરીના આંબા પર અત્યારે મોર (ફાલ) આવ્યા હોય અથવા નાની કેરીઓ બેઠી હોય, ત્યારે વરસાદ પડવાથી તે ખરી જવાની શક્યતા છે. આ ઉપરાંત ઘઉં, બાજરી અને ચણા જેવા રવિ પાકોમાં પણ માવઠાને કારણે રોગચાળો વધવાની અને ગુણવત્તા બગડવાની ચિંતા ખેડૂતો વ્યક્ત કરી રહ્યા છે.
ખેડૂતોની હાલત કફોડી
માવઠાના કારણે ખેડૂતોની આખી સિઝન નિષ્ફળ જવાનો ડર સતાવી રહ્યો છે. મોંઘા બિયારણ અને ખાતરના ખર્ચ બાદ હવે જ્યારે પાક તૈયાર થવાની તૈયારીમાં હતો, ત્યારે જ કુદરતે રૂઠતા ખેડૂતો આર્થિક સંકટમાં મુકાયા છે. જો આગામી દિવસોમાં પણ વાતાવરણ આવું જ રહેશે, તો નુકસાનનો આંકડો વધી શકે છે.
આ પણ વાંચો - Gir Somnath: ઝાંઝરીયામાં 50 ફૂટ ઊંડા કૂવામાં ખાબક્યું સિંહ બાળ, વન વિભાગે દિલધડક રેસ્ક્યુ કરી જીવ બચાવ્યો
