પંચમહાલ જિલ્લાના ગોધરા-દાહોદ હાઈવે પર વાવડી ટોલનાકા પાસે આજે વહેલી સવારે એક ભયાનક અકસ્માતની ઘટના સામે આવી છે. પુરપાટ ઝડપે અને રોંગ સાઈડમાં આવતી એક સ્કોર્પિયો કારના ચાલકે સામેથી આવતા બાઈકને જોરદાર ટક્કર મારી હતી. આ અકસ્માતમાં બાઈક પર સવાર ત્રણેય યુવાનોના ઘટનાસ્થળે જ કમકમાટીભર્યા મોત નિપજ્યા છે.
રોંગ સાઈડ અને બેફામ સ્પીડે લીધો ભોગ
પ્રાપ્ત વિગતો અનુસાર, સ્કોર્પિયો કારનો ચાલક હાઈવે પર ટ્રાફિકના નિયમોનું ઉલ્લંઘન કરી રોંગ સાઈડમાં વાહન હંકારી રહ્યો હતો. આ દરમિયાન વાવડી ટોલનાકા પાસે બાઈક સાથે તેની ધડાકાભેર ટક્કર થઈ હતી. ટક્કર એટલી પ્રચંડ હતી કે બાઈકનો કચ્ચરઘાણ નીકળી ગયો હતો અને યુવાનો રોડ પર ફંગોળાયા હતા. ગંભીર ઇજાઓને કારણે ત્રણેય યુવાનોએ સ્થળ પર જ દમ તોડ્યો હતો.