ગોધરા-વડોદરા હાઇવે પર ફરી એકવાર રકત રંજીત અકસ્માતની ઘટના સામે આવી છે. વેજલપુર પાસે આવેલી ખરસાલીયા ચોકડી પર આજે એક પૂરપાટ ઝડપે આવતી ટ્રક અને ઇકો કાર વચ્ચે જોરદાર અકસ્માત સર્જાયો હતો. આ અકસ્માત એટલો ભયાનક હતો કે ઇકો કારનો કચ્ચરઘાણ નીકળી ગયો હતો અને તેમાં સવાર બેથી વધુ લોકોને ગંભીર ઇજાઓ પહોંચી છે.
ટ્રક અને ઇકો કાર વચ્ચે અકસ્માત
મળતી માહિતી મુજબ, ખરસાલીયા ચોકડી પાસે ટ્રક અને ઇકો કાર વચ્ચે સામસામે ટક્કર થઈ હતી. અકસ્માત બાદ બેકાબૂ બનેલી ટ્રક રોડ સાઈડમાં આવેલી એક બંધ દુકાનમાં ઘૂસી ગઈ હતી. સદનસીબે દુકાન બંધ હોવાથી મોટી જાનહાનિ ટળી હતી. અકસ્માતનો અવાજ સાંભળી આસપાસના સ્થાનિક લોકો તાત્કાલિક મદદ માટે દોડી આવ્યા હતા અને કારમાં ફસાયેલા ઈજાગ્રસ્તોને બહાર કાઢ્યા હતા.
