સાબરકાંઠા જિલ્લાના હિંમતનગર-શામળાજી હાઈવે પર અકસ્માતોનો સિલસિલો યથાવત છે. હિંમતનગર તાલુકાના ગાંભોઈ ઓવરબ્રિજ પર આજે એક બેફામ કારે બાઇકને ટક્કર મારતા ગમખ્વાર અકસ્માત સર્જાયો હતો. આ દુર્ઘટનામાં બાઇક સવાર આધેડ પતિનું કરુણ મોત નીપજ્યું છે, જ્યારે તેમના પત્ની ગંભીર રીતે ઇજાગ્રસ્ત થતા હોસ્પિટલમાં સારવાર હેઠળ છે.
ગાંભોઈ ઓવરબ્રિજ પર અકસ્માત
મળતી માહિતી મુજબ, હિંમતનગરના બેરણા ગામના વતની જશુભાઈ વિઠ્ઠલભાઈ પટેલ (ઉં.વ. 62) અને તેમના પત્ની રમીલાબેન આજે પોતાના બાઇક પર સુરજપુરા તરફ જઈ રહ્યા હતા. આ દરમિયાન ગાંભોઈ ઓવરબ્રિજ પરથી પસાર થતી વખતે પાછળથી પૂરઝડપે આવતી એક કારના ચાલકે બાઇકને જોરદાર ટક્કર મારી હતી. ટક્કર એટલી પ્રચંડ હતી કે દંપતી રોડ પર ફંગોળાયું હતું.
