હિંમતનગર તાલુકાના ગ્રામ્ય વિસ્તારોમાં વન્ય પ્રાણીઓના આગમનથી ગ્રામજનોમાં ચિંતા વધી છે. હિંમતનગરના ગાંભોઈ વિસ્તારમાં આવેલા પીપળીયા ગામે સમી સાંજે એક દીપડો ખેતરમાં લટાર મારતો જોવા મળ્યો હતો. ખેડૂતે આ દ્રશ્યો કેમેરામાં કેદ કરી સોશિયલ મીડિયામાં વાયરલ કરતા સમગ્ર પંથકમાં ભયનો માહોલ વ્યાપી ગયો છે.
કેમેરામાં કેદ થયા દીપડાના આંટાફેરા
મળતી માહિતી મુજબ, પીપળીયા ગામના ચાર રસ્તા નજીક આવેલા એક ખેતરમાં દીપડો લટાર મારી રહ્યો હતો. તે સમયે ત્યાં હાજર એક જાગૃત ખેડૂતે સમયસૂચકતા વાપરી દીપડાનો વીડિયો ઉતારી લીધો હતો. વીડિયોમાં દીપડો બિન્દાસપણે ખેતરમાં ફરતો જોવા મળી રહ્યો છે. રહેણાંક વિસ્તારની આટલી નજીક દીપડો દેખાતા સ્થાનિક લોકો હવે રાત્રિના સમયે ખેતરે જતા પણ ડરી રહ્યા છે.