જામનગર શહેરમાં દબાણકર્તાઓ પર મહાનગરપાલિકાનું બુલડોઝર ફરી વળ્યું છે. આશ્ચર્યની વાત એ છે કે, જે જગ્યાએથી અગાઉ દબાણ હટાવવામાં આવ્યું હતું, ત્યાં ફરી એકવાર ગેરકાયદેસર બાંધકામ ખડું થઈ ગયું હતું, જેને મ્યુનિસિપલ કમિશનરના સરપ્રાઇઝ ચેકિંગમાં પકડી પાડવામાં આવ્યું છે.
બચુનગરમાં ફાર્મ હાઉસ ઝડપાયું
શહેરના બચુનગરમાં મ્યુનિસિપલ કમિશનર દ્વારા આજે સરપ્રાઇઝ ચેકિંગ હાથ ધરવામાં આવ્યું હતું. આ ચેકિંગ દરમિયાન એક ગંભીર દબાણનો કિસ્સો સામે આવ્યો, જ્યાં અગાઉ વૈભવી સુવિધાવાળું ધાર્મિક દબાણ હટાવવામાં આવ્યું હતું, તે જ જગ્યા પર ફરીથી એક ગેરકાયદેસર બાંધકામ ઊભું કરી દેવાયું હતું.કોઈ અજાણ્યા આસામી દ્વારા આ જગ્યાનો ઉપયોગ કરીને ત્યાં ઘોડા રાખી, વૃક્ષો વાવીને એક ગેરકાયદેસર ફાર્મ હાઉસ બનાવી દેવામાં આવ્યું હતું. આ રીતે સરકારી જગ્યા પર ફરી દબાણ થતું જોઈને મ્યુનિસિપલ કમિશનરે સખત નારાજગી વ્યક્ત કરી હતી.
