જામનગર શહેરના બાયપાસ રોડ પર અકસ્માતોનો સિલસિલો યથાવત રહ્યો છે. ગત મોડી રાત્રે ઠેબા બાયપાસ ચોકડી નજીક આવેલા બારાડી પેટ્રોલ પંપ પાસે એક પૂરપાટ ઝડપે આવી રહેલા ટ્રકના ચાલકે સ્ટેયરીંગ પરથી કાબૂ ગુમાવ્યો હતો. બેફામ બનેલા ટ્રકે રસ્તા પરથી પસાર થતાં એકસાથે ત્રણ જેટલાં જુદા-જુદા વાહનોને જોરદાર ટક્કર મારી અડફેટે લીધા હતા.
બાઇક ચાલકને ગંભીર ઇજા, જી.જી. હોસ્પિટલ ખસેડાયો
આ ત્રિપલ અકસ્માતની ઘટનામાં એક મોટરસાયકલ ચાલક ટ્રકની સીધી ઝપેટમાં આવી ગયો હતો. બાઇક સવારને શરીરના ભાગે ગંભીર ઇજાઓ પહોંચતા સ્થાનિક લોકો તાત્કાલિક મદદ માટે દોડી આવ્યા હતા. ઇજાગ્રસ્ત યુવકને વધુ સારવાર અર્થે જામનગરની પ્રખ્યાત સરકારી જી.જી. હોસ્પિટલ (G.G. Hospital) ખાતે ખસેડવામાં આવ્યો છે, જ્યાં હાલ તેની સારવાર ચાલી રહી છે.