જિલ્લામાં નશીલા પદાર્થોના દૂષણને ડામવા માટે પોલીસ અધિક્ષક દ્વારા ચલાવવામાં આવી રહેલી ઝુંબેશમાં જૂનાગઢ એસ.ઓ.જી. (SOG) ટીમને મોટી સફળતા મળી છે. સાસણ ગીરના નેશ વિસ્તારમાં રહેણાંક મકાનની પાછળ ગેરકાયદેસર રીતે કરવામાં આવેલા ગાંજાના વાવેતરનો પોલીસે પર્દાફાશ કરી લાખોની કિંમતનો મુદ્દામાલ જપ્ત કર્યો છે.
ગાંજાના વાવેતરનો પર્દાફાશ
જૂનાગઢ રેન્જ આઈજી નિલેશ જાજડીયા અને એસપી સુબોધ ઓડેદરાની સૂચના મુજબ SOG પીઆઈ આર.કે. પરમારની ટીમ પેટ્રોલિંગમાં હતી. આ દરમિયાન એએસઆઈ કરશનભાઈ મોઢા અને મેણસીભાઇ અખેડને બાતમી મળી હતી કે, મેંદરડા તાલુકાના હરીપુર-ભાલછેલ રોડ પર આવેલા લક્કડવેરા નેશમાં રહેતો એક ઈસમ માદક પદાર્થનું વાવેતર કરી રહ્યો છે. બાતમીના આધારે પોલીસે દરોડો પાડતા 47 વર્ષીય બાપુમીયા ઈસ્માઈલમીયા બુખારીના મકાનના પાછળના ભાગે, રસોડાની દીવાલને અડીને ઉગાડવામાં આવેલા ગાંજાના લીલા છોડ મળી આવ્યા હતા.
