માંગરોળ પંથકમાં કાયદો અને વ્યવસ્થાની સ્થિતિ સામે સવાલો ઉભા કરતી એક સનસનાટીપૂર્ણ ઘટના પ્રકાશમાં આવી છે. સામાન્ય રીતે રસ્તા પર અકસ્માતો અજાણતા થતા હોય છે, પરંતુ માંગરોળમાં એક યુવકને જાનથી મારી નાખવાના ઇરાદે અકસ્માતનું ગંદુ ષડયંત્ર રચવામાં આવ્યું હતું. મળતી માહિતી મુજબ, ભોગ બનનાર યુવકને આરોપીઓના પરિવારના ભાણેજ સાથે વાતચીત થતી હતી. આ વાતચીત આરોપીઓને પસંદ ન હોવાથી બંને પક્ષો વચ્ચે છેલ્લા કેટલાક સમયથી ભારે મનદુઃખ અને કડવાશ ચાલી રહી હતી.
તક જોઈને કાળ બનીને ધસી આવી કાર
આ મનદુઃખનો બદલો લેવા માટે બે શખ્સોએ હીન પ્લાન બનાવ્યો હતો. યુવક જ્યારે રસ્તા પરથી પસાર થઈ રહ્યો હતો ત્યારે આ બંને શખ્સોએ પોતાની કારને હથિયાર બનાવી હતી. તેમણે યુવકને જોઈને પોતાની કારની સ્પીડ વધારી દીધી હતી અને તેને બચવાની તક મળે તે પહેલાં જ ધડાકાભેર કાર તેની ઉપર ચઢાવી દીધી હતી. કારની જોરદાર ટક્કર અને કચડાવાના કારણે યુવક રોડ પર ફંગોળાયો હતો અને તેને માથા તેમજ શરીરના અન્ય ભાગોમાં મલ્ટિપલ ફ્રેક્ચર અને ગંભીર ઇજાઓ પહોંચી હતી. યુવકને લોહીલુહાણ હાલતમાં મૂકીને બંને નરાધમો કાર લઈને ઘટનાસ્થળેથી રફુચક્કર થઈ ગયા હતા.
