જિલ્લાના કલ્યાણપુર તાલુકાના દેવળીયા ગામમાં ધોળા દિવસે ચોરીની એક ઘટના સામે આવી છે. ખેતી અને ગેરેજ ચલાવતા વેપારી નાથાભાઈ જીવાભાઈ કરમુરની દુકાનમાં ગ્રાહક બનીને આવેલા બે અજાણ્યા શખ્સો નજર ચૂકવી રોકડ રકમ ચોરી ગયા હતા.
દેવળીયા ગામમાં ધોળા દિવસે ચોરી
ગત સોમવારે બપોરના સમયે અંદાજે 25 થી 30 વર્ષની વયના બે યુવાનો નાથાભાઈના ગેરેજ પર આવ્યા હતા. તેમણે બાઇકના સ્પેરપાર્ટ્સ જેવા કે પ્લગ અને ઓઇલ ખરીદવાની પૂછપરછ શરૂ કરી હતી. વેપારી જ્યારે તેમને સામાન બતાવવામાં અને વાતચીતમાં વ્યસ્ત હતા, ત્યારે એક શખ્સે તકનો લાભ લઈને કાઉન્ટરમાં પડેલા ₹500 ના દરની નોટોના બંડલમાંથી ₹50,000નું એક આખું બંડલ સેરવી લીધું હતું.