કચ્છ જિલ્લાના વિકાસકામોની સમીક્ષા કરવા અને જનપ્રતિનિધિઓ દ્વારા રજૂ કરવામાં આવતા પ્રશ્નોના કાયમી નિરાકરણ માટે કલેક્ટર કચેરીના કોન્ફરન્સ હોલ ખાતે જિલ્લા સંકલન સહ ફરિયાદ સમિતિની બેઠક યોજાઈ હતી. કચ્છ કલેક્ટર આનંદ પટેલના અધ્યક્ષસ્થાને મળેલી આ બેઠકમાં જિલ્લાના વિવિધ વિભાગોના ઉચ્ચ અધિકારીઓ અને ચૂંટાયેલા જનપ્રતિનિધિઓ ઉપસ્થિત રહ્યા હતા.
જનપ્રતિનિધિઓના પ્રશ્નોને પ્રાધાન્ય
બેઠક દરમિયાન ધારાસભ્યશ્રીઓ અને અન્ય જનપ્રતિનિધિઓ દ્વારા પીવાનું પાણી, રસ્તાઓની મરામત, વીજળી અને ગ્રામ્ય વિસ્તારના પાયાના પ્રશ્નો રજૂ કરવામાં આવ્યા હતા. કલેક્ટર દ્વારા આ તમામ રજૂઆતોને ગંભીરતાથી સાંભળી સંબંધિત વિભાગના અધિકારીઓને સ્પષ્ટ સૂચના આપવામાં આવી હતી કે, જનપ્રતિનિધિઓ દ્વારા રજૂ કરાયેલા પ્રશ્નો એ પ્રજાના પ્રશ્નો છે, તેનો સમયમર્યાદામાં અને હકારાત્મક ઉકેલ લાવવો એ વહીવટી તંત્રની પ્રાથમિકતા હોવી જોઈએ.
પેન્ડિંગ કામો પર લાલ આંખ
કલેક્ટર દ્વારા બેઠકમાં વિવિધ વિભાગોમાં લાંબા સમયથી ચાલી રહેલી તપાસણીઓ, નિવૃત્તિના કેસો અને પેન્શનના પ્રશ્નોની પણ સમીક્ષા કરવામાં આવી હતી. તેમણે જણાવ્યું હતું કે, કોઈપણ સરકારી ફાઈલ બિનજરૂરી રીતે કચેરીમાં રોકાઈ ન રહેવી જોઈએ. અરજદારોને પોતાના નાના કામ માટે વારંવાર કચેરીના ધક્કા ન ખાવા પડે તેવી કાર્યપદ્ધતિ વિકસાવો. સરકારી યોજનાઓના લાભો છેવાડાના માનવી સુધી ઝડપથી પહોંચે તે માટે આંતર-વિભાગીય સંકલન મજબૂત કરો.
વિકાસકામોની ગતિ વધારવા સૂચના
જિલ્લામાં ચાલી રહેલા મોટા વિકાસલક્ષી પ્રોજેક્ટ્સમાં આવતા ટેકનિકલ અવરોધો દૂર કરવા માટે કલેક્ટરે સ્થળ તપાસ અને સંકલન પર ભાર મૂક્યો હતો. આગામી સમયમાં જે કામો પૂર્ણ થવાના આરે છે, તેને ત્વરિત લોકાર્પણ માટે તૈયાર કરવા પણ આદેશો આપવામાં આવ્યા હતા. આ બેઠકથી કચ્છ જિલ્લાના વહીવટી તંત્રમાં નવી ઊર્જાનો સંચાર થયો છે. કલેક્ટર આનંદ પટેલના સીધા માર્ગદર્શન હેઠળ જિલ્લા વહીવટી તંત્ર 'ગતિશીલ અને પારદર્શક' કાર્યશૈલી તરફ આગળ વધી રહ્યું છે, જેનો સીધો લાભ કચ્છની જનતાને મળશે.
ગુજરાતના વધુ સમાચાર વાંચવા માટે ક્લિક કરો
