લીંબડી તાલુકાના અંતરિયાળ નળકાંઠા વિસ્તારના ભગવાનપર ગામે આવેલી સરકારી પ્રાથમિક શાળા છેલ્લા ત્રણ દિવસથી શિક્ષણ કાર્ય વગર સુની પડી છે. શાળામાં નિયમિત આવતા માસૂમ બાળકો વર્ગખંડમાં બેસવાને બદલે બહાર વિરોધ પ્રદર્શનમાં સામેલ થવા મજબૂર બન્યા છે. આ આખી આફત પાછળ શાળાના જ એક વિવાદાસ્પદ શિક્ષક જાદવભાઈ ડાભીનું વર્તન જવાબદાર હોવાના આક્ષેપો પંચાયત અને ગ્રામજનો દ્વારા સંયુક્ત રીતે કરવામાં આવ્યા છે. વાલીઓનો આરોપ છે કે આ શિક્ષક શાળાને પોતાની જાગીર સમજીને દાદાગીરી કરે છે અને બાળકો પર ખોટો રોફ જમાવે છે.
જૂનો વિવાદ અને તંત્રની લાચારી
સ્થાનિક સૂત્રોના જણાવ્યા અનુસાર, શિક્ષક જાદવભાઈ ડાભીની આવી જ મનમાની અને અસહ્ય વર્તનના કારણે ભૂતકાળમાં પણ મોટો વિવાદ થયો હતો, જેના પગલે વન વિભાગ અને શિક્ષણ વિભાગના દબાણ હેઠળ તંત્રએ તેની બદલી અન્ય જગ્યાએ કરી દીધી હતી. પરંતુ, આ શિક્ષકે કથિત રાજકીય વગ અથવા વહીવટી છટકબારીનો ઉપયોગ કરીને ટૂંકા જ સમયમાં ફરીથી ભગવાનપર પ્રાથમિક શાળામાં જ પોતાનું પોસ્ટિંગ કરાવી લીધું અને ફરજ પર હાજર થઈ ગયો. આ બાબતની જાણ થતાં જ વાલીઓનો પિત્તો ગયો હતો અને તેમણે પોતાના બાળકોના ભવિષ્યની ચિંતા કરીને તેમને શાળાએ મોકલવાનું જ બંધ કરી દીધું છે.
