મહેસાણા જિલ્લામાં આવેલા શક્તિપીઠ બહુચરાજીની શોભામાં હવે અભિવૃદ્ધિ થઈ છે. માં બહુચરના દર્શનાર્થે આવતા લાખો શ્રદ્ધાળુઓની વર્ષો જૂની માંગણીને માન આપીને મંદિરની બિલકુલ સામે આવેલા સર્કલ પર માતાજીના વાહન એવા કૂકડાની પ્રતિમાઓ મૂકવામાં આવી છે. આ નવતર આકર્ષણથી સમગ્ર મંદિર પરિસરની સુંદરતામાં વધારો થયો છે.
કૂકડા પ્રતિમાની વિશેષતા
માર્ગ અને મકાન વિભાગ દ્વારા આ ખાસ પ્રોજેક્ટ હાથ ધરવામાં આવ્યો છે. સર્કલ પર કુલ ત્રણ કૂકડા સ્થાપિત કરવામાં આવ્યા છે, જેની ઊંચાઈ અનુક્રમે 9 ફૂટ, 7 ફૂટ અને 5 ફૂટ છે. આ પ્રતિમાઓ ઉચ્ચ ગુણવત્તાના સ્ટેનલેસ સ્ટીલ (SS) અને બ્રાસ મટીરિયલમાંથી બનાવવામાં આવી છે. આ ત્રણેય કૂકડાની અંદાજિત કિંમત 35 લાખ રૂપિયા હોવાનું જાણવા મળ્યું છે.